SARATOK: Penanyi tebilang Iban iya nya Embat Lala, Donny Lang enggau sekeda agi penanyi Iban ke bukai entara pelakun ti nyaup ngemujurka Telemovie Kaban ti disadang deka dipandangka ba Channel 122, TVS bulan June taun baru.
Direktor begulai tememovie tu, Misha Minut enggau Ray Lee madah cherita tu deka 100 peratus ngena jaku Iban sereta udah berengkah bejalaika pengawa ngaga video.
“Telemovie Kaban tu siti endang 100 peratus ngena jaku Iban sereta dikemujurka bala pelakun ari menua (Sarawak) tu empu.
“Arapka telemovie tu ulih tembu abis laun ba bulan June taun baru tauka enti nadai penanggul maya Gawai Dayak 2022.
“Taja pia, semua nya bepanggai ba semua pemujur pengawa dikereja kami sebuat jam ke diatu,” ku iya madah ngagai Ruai Suara Sarawak.
Nangkan ke nya, ngelansa pekara bekaul Ray madahka sida (Hornbill Film) diatu udah nanggam kerejasama enggau sebuah serikat filem ari hollywood iya nya Stanulis Films dikena ngangkat ikas filem ari menua tu.
“Projek keterubah digaga asil ari kerejasama tu dikumbai Sekuel Infeksi Zombie ti diatu udah berengkah dipejalaika.
“Jam kediatu, kami benung merambu deka numbuhka Studio Stanulis Production enggau tuju dikena ngasilka drama televisyen bekenaka ngena jaku Melayu, China enggau ke bukai.
“Semua pengawa begambar drama tu ila deka diperambu deka digaga ba menua tu empu (Malaysia) kelimpah ari menua bukai ti besemak,” ku Ray Lee.
Ungkup penemu, bala pelakun bukai ti deka ngemujurka Telemovie Kaban tu iya nya Charles May, Slyvester, John Watson Tamin, Daniel James, Mbrose Mith, Dara Helena, Patricia Judin kelimpah Misha Minut empu.
