Empat bagi menua ngatur Forest Fun Run

KUCHING: Program Forest Fun Run bebida ari pelanda bukai ti diatur di Sarawak.

Pelanda tu deka diatur ba empat bagi menua di Sarawak iya nya Taman Tumbina, Bintulu kena 25 Ogos, Rizab Rampa Asal Piasau, Miri (8 September), Bukit Lima, Sibu (22 September) enggau Librari Nengeri (3 November).

Nitihka penerang Direktor Opis Kampung Sarawak Hamden Mohammad, pelanda tu sebagi ari program ngintu Makai Taun ke-100 opis nya ti ditumbuh ba taun 1919.

Ku Hamden, aktiviti baka tu ulih ngerapitka agi tanggam kaul entara Opis Kampung Sarawak enggau mensia mayuh, meri pemereti ati manah agi pasal pangku pengawa enggau tanggungpengawa sida ba opis nya.

Seriris enggau komuniti diatur ngemerat enggau ngemeranka gaya idup bepengerai ku iya, Opis Kampung Sarawak begulai enggau bakih pengatur baka Shin Yang, Ta Ann, Sam Ling, Gerempung Kayu Ramu Sarawak (STA) enggau WTK deka besaup ngatur pelanda ba empat bagi menua lalu Grit Event Management dipadu ngatur semua atur enggau pejalai pelanda.

NESAU SEMUA… Hamden Mohammad bejadika program Forest Fun Run di Wisma Sumber Alam, apin lama ke udah.

Pia mega ku Hamden, 100 penyereta mujur nembuka pelanda deka diberi paung ngambika ditanam dia.

“Nama sida deka ditulis ba paung kayu ti ditanam pengudah seminggu pelanda nya diatur,” ku iya.

Iya mansutka jaku nya rambau aum media di Wisma Sumber Alam, Petrajaya, apin lama ke udah.

Hamden nerang, midul deka ditengkebang nyauka nunda gamal bansa kayu nyelai ti bisi tumbuh di bagi menua nya baka kayu Tebelian di Bintulu, kayu Tapang di Miri, kayu Ensurai di Miri enggau kayu Engkabang Jantong di Kuching.

“Bala penyereta pelanda dipinta mayar RM50 siku maya rejista nama.

“Kelimpah ari midul, sida mega deka diberi baju, bib, kantung enggau tepa,” ku iya.

Hamden nibarka jaku tesau ngagai mensia mayuh ti rinduka pengawa tu rejista nama diri nengah online ba website www.gritevent.com/forestrun.
-abis-

Suara Sarawak