KUCHING: Komiti Nembiak Parti Pesaka Bumiputera Bersatu (PBB) numbuhka empat biro dikena negapka komiti parti kelimpah nyadi tulang belakang ngatur program enggau aktiviti parti.
Tuai iya, Miro Simoh madah empat biro tu iya nya Biro Pengatur Program enggau Aktiviti; Biro Ekonomi enggau Dagang; Biro Rama enggau Pengintu Pendiau enggau Biro Politik, Kaban Parti enggau Komunikasyen.
“Biro Pengatur Program enggau Aktiviti deka betuaika Kaban Kunsil Nengeri (Adun) Tellian, Royston Valentine. Iya deka beratika perambu enggau langgur program sereta aktiviti bekaul enggau parti sereta nembiak ba Sarawak.
“Ungkup Biro Ekonomi enggau Dagang deka diiring Adun Tanjung Datu, Azizul Annuar Adenan. Nengah biro tu, kitai deka mai raban nembiak disikap enggau penemu ekonomi sereta pengawa dagang,” ku iya.
Iya madah munyi nya ba aum pemberita pengudah aum komiti exco Komiti Nembiak PBB keterubah ba Indu Opis PBB di Jalai Bako ditu, kemari.
Nerang silik, ku Miro, Adun Machan Allan Siden Gramong deka ngiring Biro Rama enggau Pengintu Pendiau.
Ku iya, tu endang biro ke pemadu beguna laban nyadi sebagi ari komuniti siru kelimpah ngatur bantu bekaul enggau pengintu pendiau enggau rama.
“Kaban Parlimen Sibuti, Lukanisman Awang Sauni dipadu nyadi tuai Biro Politik, Kaban Parti enggau Komunikasyen. Biro tu deka bejalaika tanggungpengawa berat nerenak ulah politik ba rayat.
“Empat biro nya deka mantu komiti sayap nembiak ngemujurka mayuh program seraya ngedut kaul enggau rayat,” ku iya.
Berebak enggau nya, sayap nembiak PBB 1828, Miro madah naka tu PBB agi nganti pemendar ari Opis Pengerejister Gerempung (ROS).
Nya alai, ku iya, Biro Politik, Kaban Parti enggau Komunikasyen ditumbuh lalu deka nyadi jematan ngatur kaul entara sayap nembiak enggau orang biak 1828.
“Nengah biro tu, kami deka ngatur mayuh program begulai enggau nembiak ngambika sida lebih nemu pengawa ba bidang politik dan nereka ulah sida begulai enggau parti.
“Pia mega kami deka ngereja pengawa lalu ngatur program bekaul enggau orang biak awak sida rindu begulai enggau parti,” ku iya.
