Empat diri sebilik selamat asil bantu tumu raban deriba GrabFood

KUCHING: Empat diri sebilik nyengkaum dua iku nembiak tepekul pengudah kerita dikena sida tepawah ke parit penalam tujuh kaki di Jalai Camar enda jauh ari Sekula Sekondari (SMK) Sekura, malam tadi.

Ku Pengari Palan Komiti Operasyen Bomba Sarawak, ripot pasal penusah tu nyadi diterima urung jam 9.20 malam pengudah dipelaba nguji nyeliahka sebuah agi kerita bukai ti pansut ngenyit ari simpang.

Tandu iya, raban ari Balai Bomba enggau Penyelamat (BBP) Petra Jaya udah digerah ngesah palan penusah nya.

Terang iya, asil saup tumu ari mensia mayuh nyengkaum orang ti nganjung pemakai GrabFood terejun ke parit ba palan nya udah mujur nyelamatka sida ti benung tepekul.

“Komander operasyen bomba madahka bisi empat iku dalam kerita ti tepawah iya nya siku lelaki enggau indu sereta dua iku nembiak.

“Semua sida mujur dikeluarka mensia mayuh ke nyadi responder keterubah mantu sida ari terus tepekul dalam kerita ti berengkah tama ai,” ku iya dalam penerang, tadi.

Asil pansik tumu tim operasyen madahka, semua sida selamat enggau semina bakal mimit.

Udah nya ku iya, semua sida ti tepekul tu dianjung berubat ngagai Sepital Besai Sarawak.

Berebak enggau nya, iya mega meri terima kasih ngagai bantu mensia mayuh laban jampat mantu sida ti tepekul sereta nyeliahka penyadi nabanka nyadi.

Dulu ari nya, urung 12 iku mensia mayuh nyengkaum deriba GrabFood terejun ngagai parit penalam tujuh kaki mantu ngeluarka sida ti tepekul dalam kerita.

UDAH TAMA AI…Pendiau kerita ke udah tekalih pengudah tepawah ari jalai raya.

Suara Sarawak