BALAI RINGIN: Menteri Muda Nembiak enggau Lumba Datuk Snowdan Lawan udah nyuaka chek penyampau RM420,000 ngagai empat buah gerija ba Balai Ringin di baruh Unit Pekara Pengarap Bukai (Unifor), Hari Minggu tu tadi.
Tiga buah gerija ti nerima chek tu iya nya Gerija Seven Day Adventist (SDA) Simpang Pantu, Gerija Baptis Lachau enggau Gerija Baptis Pantu.
Kaban Kunsil Nengeri (Adun) Balai Ringin nya mega ngelalau rayat ba sitak nya seruran begulai enggau Gempung Parti Sarawak (GPS) maya Pengawa Bepilih Nengeri Ke-12 (PRN12) ke deka datai laban parti nya ulih mai pemansang ngagai menua pesisir.
“Perintah GPS keran ngubah tikas idup rayat lebuh ngelanggur mayuh pemansang infrastruktur baka jalai ngelawa genturung pendiau, jalai kebun, bekal elektrik enggau bekal ai beresi.
“Bida entara kitai (perintah) enggau penyakal iya nya kitai fokus ngelanggur enggau mai pemansang tang penyakal seruran malut runding rayat,” ku Snowdan nyemetak madah.
Snowdan mansutka jaku nya rambau Program Randau Ruai GPS Begulai enggau Adun Balai Ringin ti mega Menteri Muda Nembiak enggau Lumba di Kampung Limau, kena Hari Minggu ke udah.
Iya mega nangkan rayat anang nitih ati ringat maya ngundi laban ulah nya tau pulaika pengerugi.
Terang iya, GPS nya mih parti ke patut dipilih laban ngembuan rikod pemadu manah.
Snowdan mega ngarapka rayat anang salah pilih laban sida ngasaika penusah nganti lima taun agi endur perintah betukar.
“Entara pengawa dikereja Perintah GPS apin lama iya nya ngemendar pengawa nyiri 47 ketuai raban bansa baru ungkup Dun Balai Ringin.
“Sepuluh iku udah nerima setipikit dichiri ari Abang Johari,” terang iya.
“Tu bereti, mayuh agi genturung pendiau enggau rumah panjai diaku dalam data perintah,” tandu Snowdan.
Berebak enggau nya, Snowdan ngelalau genap kaban Komiti Pemansang enggau Pengelikun Genturung Pendiau (JKKK) seruran bejalaika pangku pengawa diri laban sida deka ngatur projek pemansang dalam genturung pendiau sida empu dudi hari.
