SIBU: Bisi empat indu enggau dua lelaki mujur diselamat raban bomba pengudah tepekul ba penusah angus mungkur sebuah hotel di Lorong Emplam, Jalai Kampung Nyabor, ditu tadi.
Tuai Bomba Zon 4 Sibu Andy Alie madah, sida nerima kangau ngenyit bekaul penusah begunan (bilik hotel) nya angus urung pukul 9.13 pagi.
“Balai Bomba enggau Penyah Penusah (BBP) Sibu Sentral udah nya ngerah 10 raban sereta sebuah entukar FRT Scania enggau EMRS ngagai endur penyauh urung satu kilometer ari balai.
“Datai ba endur nya dipeda bisi sebun sereta api keluar ari jenila bilik hotel ba ringkat satu,” ku iya nerang.
Ku iya, pengudah ‘size up’ dipeda bisi orang enda ulih keluar laban jalai udah dibalut sebun.
“Raban bomba udah nyelamat sida nya ngena tangga seraya ngena hos 200 kaki 1 nozel dikena madam api.
“Semua sida nyengkaum dua iku lelaki enggau empat iku indu mujur diselamat,” terang iya.
pengudah nentuka palan nya likun, operasyen diketu lalu raban Bomba mupuk pulai ke balai pukul 10.23 pagi.
