Empat kes baru positif Covid-19 di Sarawak

KUCHING: Sarawak ngerikod empat kes baru positif Covid-19 kemari lalu ngujungka penyampau positif bisi 459 kes kenyau kes keterubah diripot kenaka 13 March 2020.

Sapit Kepala Menteri ti mega nyadi Chairman Komiti Penyangga Penusah Ngenyit Nengeri (JPBN) Datuk Amar Douglas Uggah Embas madahka ari empat kes nya, dua kes di Sepital Sibu lalu siti kes di Sepital Bintulu enggau Sepital Miri.

“Seharitu nadai kes positif baru dirikodka di mengeri Kuching,” ku iya.

Uggah madah munyi nya ba aum pemberita di Wisma Bapa Malaysia ditu, lemai tadi.

Ku iya, bisi 27 kes positif Covid-19 ke udah gerai sereta dikemendarka pansut ari sepital, kemari.

“Ari penyampau ke udah dikemendarka pansut nya, bisi 21 kes di Sepital Besai Sarawak (SGH), tiga di Sepital Miri, dua di Sepital Sibu lalu siti di Sepital Bintulu,” ku iya.

Nangkan nya ku iya, penyampau kes Pesakit Agi Dipatau (PUI) nambah ngagai 257 kes kemari dibanding 155 kes, ensanus.

“Pekara tu berindik ari Komiti Pengatur Pengawa udah nambahka pengawa sida mansik genap kaul ke bisi di Kuching,” ku iya.

Ku Uggah, 87 kes PUI udah ditemu negatif kemari lalu 253 agi nganti pemutus ari makmal.

Berebak enggau nya, iya mega madahka piak polis udah ngetanka 80 iku orang ba nengeri tu ke ngelaban Atur Tagang Pejalai (PKP).

Nya alai Uggah mengkang ngelalau mensia mayuh ngambika meri kerejasama ngagai perintah ba pengawa nagang pengerekai Covid-19 ba menua tu.

“Naka ke diatu, rayat Sarawak mengkang ba 97 peratus nitihka atur PKP sekumbang atur nya diteritka ba menua tu.

“Aku nemu pekara tu engka mai penusah ngagai rayat bejalaika pengawa ninting hari, tang tu mih chara kitai ulih nyaga pengerai diri empu enggau diri sebilik,” ku iya madah nyemetak.

Suara Sarawak