KUCHING: Empat kes pemati ketegal rabies ti diripotka bulan Ogos enggau September tu ditemu enda diperubat tumu ba sebarang fasiliti pengerai.
Ku Direktor Pengerai Sarawak, Dr. Ooi Choo Huck, dua ari kes nya bisi sejarah diketup ukui diinang sida, siti kes bisi sejarah dikeramak mayau seraya siti kes dipelaba kena rampit maya nguburka bangkai ukui.
“Semua kes enda diperubat ba sebarang fasiliti pengerai pengudah diketup, dikeramak tauka nguburka bangkai jelu,” terang iya.
Nangkan nya, iya madah, Opis Pengerai Nengeri Sarawak (JKNS) ngerikod 17 kes rabies entara mensia enggau 15 kes pemati ari 1 Januari nyentuk 17 September taun tu.
Ku iya, ari semua kes nya, lima kes nya ari Sibu, empat kes ari Serian, tiga kes ari Kuching, tiga kes ari Bintulu enggau dua kes ari Samarahan.
“Kes majak nambah dibanding semina 10 kes ba timpuh sebaka taun 2022 iya nya nambah tujuh kes tauka 70 peratus,” terang iya baru.
Dr. Ooi madah, kumulatif kes rabies entara mensia di Sarawak ti diripotka kenyau ari igi penyakit nya dikenuku ngerekai kena Julai 2019 nyentuk diatu nya 72 kes enggau 65 kes pemati.
