Empat kluster baru, tiga ngaul komuniti rumah panjai

KUCHING: Empat kluster baru ditukuka ba Pelilih Beluru, Sebauh, Bintulu enggau Selangau sehari tu.

Komiti Penyangga Penusah Nengeri (JPBN) Sarawak ba sebengkah penerang berita tadi madahka kluster baru nya Kluster Long Jegan, Beluru, Kluster Sungai Mas, Sebauh, Kluster Batu 25, Bintulu enggau Kluster Sungai Nirai, Selangau.

Ke penerang, Kluster Long Jegan, Beluru ngaul sebuah sekula primari di Long Jegan pegai Pelilih Beluru.

Kes indeks ditemu ari siku pengajar lelaki beumur 25 taun ti ditemu positif Covid-19 kena 22 April laban bisi nunjukka kelai kena rampit.

Ku JPBN, Kluster Sungai Mas, Sebauh ngaul sebuah komuniti ba sebuah rumah panjai ba Sungai Mas dipegai Pelilih Sebauh.

Kes indeks datai ari orang ti nunjukka kelai dirampit lebuh beperesa ba sebuah klinik peribit di Bintulu.

Kluster baru ti ketiga dikumbai Kluster Batu 25, Bintulu mega ngaul sebuah komuniti di sebuah rumah panjai ba Batu 25, Jalai Miri-Bintulu di Pelilih Menua Bintulu.

Kes indeks datai ari siku nembiak beumur semilan taun ti ditemu positif Covid-19 lebuh beperesa ba klinik peribit kena 22 April laban bisi nunjukka kelai dirampit.

Kluster ti kepenudi iya nya Kluster Sungai Nirai, Selangau mega ngaul sebuah komuniti di sebuah rumah panjai Sungai Nirai di Pelilih Menua Selangau.

Kes indeks ditemu ari siku indu beumur 25 taun ti positif Covid-19 ba Sepital Sibu kena 26 April.

Kes indeks tu benung ribat lalu iya berengkah nunjukka kelai dirampit kena 11 April.

Nitihka pansik, indu tu semina mindah ba genturung rumah panjai sida aja.

Suara Sarawak