KUCHING: Bisi empat ku luyar baru diterima masuk ba Kort Tinggi Sabah Sarawak di Kort Tinggi Kuching, ditu, kilah ensana.
Empat luyar baru tu iya nya Nur Azureen Zainudin, Sharron Yee Mei Fey, Ningkan Hamilton, enggau Chrissie Ngiron Mijun ti baru ngangkat sumpah rasmi nyadi luyar ba mua Akim Kort Tinggi Kuching Dr Alwi Abdul Wahab.
Akim Dr Alwi madah, nyadi luyar baru enggau milih profesyen nya nyadi batang pengawa begunaka pengawa belajar seumur idup.
“Orang ke nyadi luar enda ulih nyebut diri udah chukup belajar. Tang belajar mih pekara baru nitihka pengeremai penemu baru lalu nya deka mai kitai ngagai siti tikas pemintar ke diguna ungkup negika undang-undang enggau pekara ke adil.
”Pekara beguna ba orang ke nyadi lutar iya nya integriti. Kebuah pia laban mensia mayuh begunaka hak enggau ngandalka integriti ke tinggi ari bala kita.
“Penatai kita ngagai opis luyar kebendar megai siti tanggungpengawa ke chukup besai ungkup orang ti begunaka kita enggau Kort lebih agi bekaul enggau pengawa negika pekara ti adil,” ku iya.
Iya madah munyi nya maya pengawa Nerima Penatai Luyar Kort Tinggi Sabah Sarawak ditu, kilah ensana.
Tandu iya, iya ngasai diri chukup gagit laban ulih nyadi tuai atur pengawa betimpai mua enggau luyar baru ti masuk Opis Luyar Sarawak pengudah dua taun semina diatur nengah chara online ketegal nagang pengerekai Pandemik Covid-19.
Nangkan ke nya, dua luyar baru iya nya Ningkan Hamilton, 26, enggau Nur Azureen ari Messrs Christopher Bada & Company Advocates.
Udah nya, Sharron Yee ari Messrs David Allan Sagah & Teng Advocates, enggau Chrissie Ngiron ari Messrs Wendy Jorai Advocates.
Bela datai ngarika Luyar Sarawak Supian Tarmizi Mohamad Tazuddin enggau Pengari Gerempung Advocate Sarawak Desmond Sahathevan.
