Empat pampang bank ngelawa menua ulu

KUCHING: Empat pampang bank di Sarawak deka ngelawa genturung pendiau ngambi nyendiaka servis bank ngagai peranak menua ulu ditu.

Kepala Menteri Datuk Patinggi Abang Johari Tun Openg madah, empat bank tu iya nya Bank Simpanan Nasional (BSN), Bank Rakyat, Agro Bank enggau RHB Bank.

“Kami meri terima kasih ngagai raban bank laban deka nyendiaka servis bank mindah kin kitu ngagai menua ulu.

“Ambika banding, BSN deka nyendiaka servis ba Sebauh enggau Sungai Asap di Bintulu seraya Bank Rakyat deka nyendiaka servis di Sebauh, Tatau, Sungai Asap enggau Belaga,” ku iya.

Abang Johari mansutka jaku nya ba aum pengudah ngelancharka servis bank mindah kin kitu ba lama Begunan Dun Lama, ditu kemari.

NERANG… Abang Johari disempulang Masing, Jaul enggau bala bukai meri penerang pasal servis bank mindah kin kitu ke deka disedia ba menua ulu.

Nambahka nya ku Abang Johari, Agro Bank mega nyendiaka servis mindah kin kitu ba Pantu, Padawan, Bau, Lundu, Sematan, Lingga, Tebedu, Asajaya enggau Sebuyau.

“Sitak nya sitak betanam betupi lalu penumbuh bank mindah kin kitu tu deka ngemuntangka bala pekebun ngaduka pengawa.

“RHB Bank mega nyendiaka servis ba Asajaya, Sadong Jaya, Balingian, Oya enggau Igan,” terang iya.

Terang iya, Perintah Sarawak ngagihka belanja RM1.6 juta ungkup raban bank meli entukar ti nyendiaka semua servis bank ba mengeri.

“Tu pemungkal dikena kitai ngelempung tating penusah ditapi peranak menua ulu lalu pekara tu dikemendar Bank Negara Malaysia (BNM).

“Kelimpah ari nya, servis bank mindah kin kitu nya keterubah di Malaysia,” terang iya.

Sama datai Menteri Pemansang Pedagang enggau Gerempung Kerejasama, Dato Sri Dr. Haji Wan Junaidi bin Tuanku Jaafar, Sekretari Perintah Sarawak, Datuk Amar Jaul Samion, Menijar Bank Negara Malaysia, Mohd Irman Mohd Din enggau Sapit Sekretari Perintah Sarawak, Dato Sri Mohamad Abu Bakar Marzuki.-FENNY SILONG.

NGELANCHAR… Abang Johari ngelancharka servis bank mindah kin kitu ungkup peranak menua ulu.

Suara Sarawak