SIBU: Bisi empat Projek Rayat di Dun Bawang Assan udah dianjung ngagai Kepala Menteri Datuk Patinggi Abang Johari Tun Openg apin lama ungkup dikemendarka.
Pekara tu dipadahka Sekretari Politik Kepala Menteri Romeo Christopher Tegong ti mega Tuai Pampang PBB Bawang Assan lebuh bejadika Projek Sapat Tebing Sungai ba Rumah Dennis Ansam, Bawang Assan kena lemai Hari Enam.
Ku iya, Projek Rayat ti dipadahka tu iya nya projek bekal ai beresi ngagai peranak Kampung/rumah panjai di Tutus, Sebedil, Bungan Besar, Bungan Kecil enggau Sungai Pinang.
“Empat Projek Rayat tu beungkus RM25 juta sereta nguna urung 14.5 kilometer jalai paip ti dipelabaka deka meri pemaik ngagai lebih 1,000 buah ruang bilik.
“Aku udah ngaga peminta nya enggau udah nganjung peminta ngagai Kepala Menteri,” ku iya.
Bekau ari nya, Romeo ngarapka peranak di palan nya ulih besabar nganti projek ke dipinta.
“Awakka Kepala Menteri empu ngemansutka projek tu silik agi enggau aku enda ulih madah ngagai kita silik. Pengawa aku semina mantu rayat madahka pasal projek nya ngagai orang ti lebih tinggi.
“Dikemendarka tauka enda, nya tepulai ngagai Kepala Menteri, nya alai besampi meh kitai ngambika projek tu dikemendarka,” ku iya.
Berebak enggau nya, Romeo madahka taja pan sitak Dun Bawang Assan ukai sitak Gempung Parti Sarawak (GPS) tang rayat dia endang patut nerima pemansang ti senutuk.
Sebedau tu, iya mayuh mantu peranak di sitak nya ngaga peminta projek perintah ungkup pengelikun peranak dia.
“Aku ulih madah ngagai Kepala Menteri pasal penanggul sereta peminta ngulihka projek pemansang taja pan sitak tu ukai sitak GPS.
“Sebedau penggal tu, kitai di Bawang Assan udah mayuh mantu chalun Barisan Nasional (BN) nyadi pengari rayat dalam pengawa bepilih nengeri.
“Kenyau penuduk Dun Bawang Assan tu besilih ari perintah ngagai penyakal, aku udah mantu urung 106 buah rumah panjai enggau kampung iya nya 2,416 ruang bilik ngulihka projek nitihka peminta Komiti Pemansang enggau Pengelikun Genturung Pendiau (JKKK) ditu,” ku iya.
Nangkan ke nya, rumah panjai enggau kampung ti ngaga peminta ngagai Projek Mit Menua Pesisir (MRP) dipesan ngambika ngena bantu perintah nya enggau manah.
Romeo madahka, genap MRP ti diberi mesti dikena ngatur projak pemansang ungkup pemaik peranak.
“Enti ulih anang magi agih belanja nya nyadi mata duit ngagai genap ruang bilik. Guna meh bantu nya ngaga projek ngambika pemeri ari perintah tu bisi nyadi kelai.
“Enti bantu nya dibagi ngagai ruang bilik, duit deka jampat abis tauka dikena tuju bukai sereta nadai reti MRP meri enti semina dibagi bala peranak aja.
“Aku ngelalau ngambika JKKK ngatur projek ti ulih meri pemaik baka nyeruri rumah, ngaga rumah, ngechat rumah enggau ke bulai ngambika MRP ti dipinta bisi tuju,” ku iya.
Iya meri chunto Rumah Dennis ti nguna MRP ungkup pejalai Projek Sapat Tebing Sungai ke pemaik sida serumah.
Projek pemesai 64 meter nya beungkus RM80,000 udah berengkah digaga pun bulan September enggau tembu tengan bulan Oktober tu dipejalaika enjensi Opis Parit enggau Entali Ai Sibu.
