KUCHING: Bekau pejalai Atur Mindah Betagang (PKP) ari taun 2020 Rosila Rasul, 40 baru iya bisi peluang pulai menua ngintu Hari Raya pengudah empat taun enda pulai.
Rosila madahka sebedau tu iya enda ulih pulai ke menua ketegal mayuh penanggul kelebih agi pengerekai penyakit Covid-19 ti nuntung dunya.
“Maya taun 2018 aku enda ulih pulai raya laban betubuh bisi ke anak ti keempat, lalu ba taun 2019 ketegal anak agi mekang aku ngambi pemutus enda pulai raya dulu.
“Ku ati deka pulai ke menua taun 2020 tang PKP enggau pengerekai Covid-19 nanggul semua perambu aku deka ngintu Hari Raya di menua,” ku iya lebuh dirandau Suara Sarawak ba Terminal Bas Kuching Sentral, kemari.
Anak pengkuan Rosila diatu beumur empat taun baru bisi peluang pulai ke menua betemu enggau tudah ini ti seruran nganti penatai sida sebilik.
“Sinu lebuh ngenang diri semina ulih betemu nengah kangau telefon aja ngelama tu nya alai aku mai kami sebilik pulai ke menua.
“Tambah mega, gerah nendurka Atur Pengawa Standard (SOP) ngasuh kami pechaya agi pulai ke menua,” ku iya.
Iya madahka tu meh kali ti keterubah anak pengkuan iya nya betemu enggau indai iya empu taja pan suah betemu ba atas tali arus aja.
“Puji Tuhan, pengujung iya kami ulih pulai berami ngintu Hari Raya enggau bala di menua.
“Ngarapka kitai terus nyaga diri lebuh berami tu ila, enti deriba bejimat, nadai ngawa kitai laun datai asalka selamat datai ba palan ti dituju.
“Nyema kita ngena servis bas anang laun meli tikit enggau datai ba terminal nangika kitai ditinggalka bas,” ku iya.
Nangkan nya, pekereja pengawa servis pengangkut Ramsi Mapi, 47 madahka tikit bas jam diatu nyau baka ‘pisang goreng panas’.
“Ari 28 April nyentuk 2 Mei semua tikit bas dijual aku udah ambis, laku.
“Enti hari bukai kurang ari tujuh buah bas bejalai, tang rambau musin pengerami tu bisi semilan buah bas diguna ke alai semua palan duduk udah penuh magang,” ku iya.
Iya madahka orang ti ngambi peluang pulai ke menua rambau musin pengerami tu iya nya bala nembiak enggau orang ti gawa di mengeri.
“Ngagai mensia mayuh ti deka pulai ngena bas, aku ngelalau sida meli tikit tumu laban tikit bas jam diatu jampat abis,” ku iya.
