SARATOK: Empati Ningkan, 69, iya nya siku orang ti ngining diri deka bediri ngarika Parti Keadilan Rakyat (PKR) ba sitak Dun N.39 Krian ungkup Pengawa Bepilih Besai Nengeri Ke-12 (PRN-12) madah diri pansut tekala nya ari parti nya.
Empati madah pemutus nya digaga laban enda lantang ati enggau pemutus digaga Tuai Parti PKR ti enda ngemendarka chalun ari PKR bediri ba Dun N.39 Krian ungkup PRN-12.
“Enggau tu aku deka madah diri deka badu agi ‘nyemilik’ Parti Keadilan Rakyat (PKR) Pampang Saratok berengkah ari diatu.
“Tu berindik ari pemutus Presiden PKR Datuk Seri Anwar Ibrahim ti enda ngasuh chalun PKR bediri ba Krian.
“Pengawa aku ti ningkilka diri ari parti tu mega disempulang urung 2,000 iku bala aku ngelama tu,” ku iya ba Program Penemuai Chalun GPS ba Rumah Endawie, Nanga Gerenjang di Krian pagi kemari.
Nangkan ke nya, iya minta bala penyukung iya ngelama tu meri sukung penuh ngagai chalun Gempung Parti Sarawak (GPS), Friday Belik ba PRN-12.
“Ngena peluang tu, aku deka nesau semua penyukung aku ti bisi urung 2,000 iku bela nyukung chalun ari Parti Demokratik Progresif (PDP) ke mega ngarika GPS.
“Badu agi kusut runding lalu kereja mih pengawa enggau lurus kelimpah kena mih peluang tu enggau manah ke pemaik rayat Krian.
“Rayat Krian patut nyukung Friday Belik lalu anang mangkah chalun bukai” ku iya.
Sebedau tu Empati ke mega udah pinchin pengajar neleba diri ba politik kenyau ari taun 1990 sebedau masuk PKR taun 2009 sereta bisi ati deka nyadi chalun ngarika PKR ba PRN-12 tang pekara nya nadai nerima sukung ari Tuai PKR.
