KUCHING: Sepenyampau enam iku peranak menua ngaku diri ditipu peluang pengawa puang agi tepekul di menua Kemboja.
Adun Batu Kitang Lo Khere Chiang madahka iya berasai sinu sereta asa laban sekeda peranak ti ditipu tu datai ari peranak di baruh sitak iya.
“Ripot polis udah digaga, ruang bilik enam iku ti ngaku diri kena tipu tu bisi datai ngusung aku minta bantu.
“Aku ngatur aum media sehari tu (kemari) ngambika semua kitai bejaga enggau ulah jai orang ti deka nipu madahka gaji besai, bulih pengidup ti nyamai enggau mayuh semaya bula ti bukai enti gawa ba dini-dini tauka menua luar,” ku iya.
Khere Chiang bejaku munyi nya ba aum media bekaul kes nya di Palan Servis Gerempung Parti Sa’Ati Rayat Sarawak (SUPP) Pampang Batu Kitang ditu, tadi.
Ku iya, enam iku peranak menua nya ngusung menua Kemboja laban disemaya bulih pengawa ti manah sereta begaji besai, lalu sida udah kin tiga minggu ti udah lalu.
“Sida beumur 19 nyentuk 38 taun, aku enda ulih madah nyentuk laban pekara tu benung dipansik polis.
“Aku minta tulung ngagai Kedutaan Kemboja enggau Kedutaan Malaysia sereta polis Kemboja enggau polis Malaysia nyengkaum raban politik din nulung enam iku tu awakka sida pulai enggau likun,” ku iya.
Chairman Kaunsil Kandang Mengeri Padawan (MPP) nya ngelalau apai indai ngambika matau sereta nemu kini tungga pejalai bala anak dikena nyeliahka kes orang nipu tu nyadi.
“Enti nemu bisi utai ti enda tentu menuku pesan ngagai anak kitai ngambika enda kena tipu.
“Baka nya mega bala anak, anang enda mendingka jaku orang tuai sereta mansik manah semua peluang pengawa puang ti dibai orang laban pengaya baka duit ringgit tu enda datai penchuma tauka labuh ari langit,” ku iya.
Taja enda entu nemu enggau nyemetak Khere Chiang madahka enam iku ti ngaku diri ditipu tu madahka sida bisi kena palu ketegal enggai diasuh nyadi ‘scammer’.
Iya nangkan nya, ngarapka penanggul ti nuntung sida nya ulih diputarka enggau jampat.
Ungkup penerang kena 9 April tu tadi bisi 16 iku peranak menua Malaysia ti ditipu iklan pengawa puang ti tepekul di Kemboja udah mujur dibai pulai.
Kelimpah ari nya, kena 23 April, Adun Dudong Datuk Seri Tiong King Sing mujur mantu siku indu ti ditipu sindiket peluang pengawa puang ti bedagangka mensia di Thailand.
