KUCHING: Gerempung Pengajar Bumiputera Sarawak (KGBS) sepenemu enggau Menteri Pelajar Fadhlina Sidek ngambika Sijil Tinggi Persekolahan Malaysia (STPM) tauka Pelajar Pom Enam enda ibuh dipadam.

Presiden KGBS Zulkiflee Sebli madah, sekula pom enam agi relevan enggau agi nyadi siti ari syarat nembiak deka nampung sekula ngagai palan pelajar tinggi (IPT).

“Pelajar pengelama dua taun ba renggat tu enda sebaka enggau matrikulasyen, bisi pengelebih pelajar ba tikas nya.

“Agi bisi peresa STPM ditapi nembiak, ke alai silibus sida lebih ngagai peluang nyikap diri napi sekula ba universiti tauka ‘pra-universiti’,” ku iya lebuh ditanya Suara Sarawak kemari.

Ku iya, nengah aku antarabansa, pelajar ba Pom Enam tu tentu nyikap nembiak ngambika ulih besedia maya nampung sekula ba universiti.

“KGBS tegap enda setuju enggau perambu madamka STPM.

“Patut iya, status pelajar STPM tu diangkat ngambika bala nembiak lebih komited deka nyapai penyulut ngagai renggat ti tinggi agi dalam sistem pelajar sekula menua kitai.

“Nembiak enggau pengajar patut diberi sukung enggau semua perengkaguna awak ulih ngeluarka nembiak ti manah, nyikap diri, teguh enggau ulih nyingkang ngagai semua IPT ti dipilih sida,” ku iya.

Nya alai, iya madah, endang nyadi tanggungpengawa KGBS seruran nyaga pengelantang bala pengajar.

“Nyema pengelantang bala pengajar dijaga, sida ulih meri fokus dalam pengawa ngajar nembiak.

“Kitai berasai temegah ngagai pengajar ti ngembuan pengelebih ngajar nembiak ti ngambi STPM.

“Mayuh insentif diberi sebedau tu diberi sekali ke ba pangku pengawa tauka gred pengawa ti niki awakka nyadi semangat dikena sida gawa,” ku iya.

Iya nangkan nya, andalka KPM meri perati ngagai nembiak enggau pengajar STPM awak ulih meri empas ti besai lalu ngeluarka raban nembiak ti meruan.

“Pansik nambahka insentif khas ngagai pengajar pom enam mega mesti seraris enggau atur STPM ba renggat antarabansa,” ku iya.