Enda ngadang jematan besi ulih rarat – Chukpai

MURUM: Jematan baru ‘bailey bridge’ deka digaga dikena nganti jematan besi ngelawa Rumah Raymund Lahang di Long Tirat, Tubau ke udah rarat ketegal ampuh bah malam hari Tiga tu tadi.

Kaban Kunsil Nengeri (ADUN) Murum Kennedy Chukpai Ugon madah, projek jematan urung 30 meter panjai nya deka digaga enda lama agi.

“Kitai enda ngadang jematan besi ngelawa Rumah Raymund tu tau rarat tang benasit bendar maya penusah nya nyadi malam hari Tiga tu tadi peranak rumah panjai nya nadai bakal.

“Nya alai, kitai deka ngaga siti jematan besi tauka ‘bailey bridge’ dikena nganti jematan ke udah rayat enda lama agi,” pia ku iya nengah laman Facebook Palan Servis Mensia Mayuh ADUN N.66 Murum, kemari.

Kena hari Empat tu tadi, iya enggau Kaban Parlimen Ulu Rajang Datuk Wilson Ugak Kumbong sereta Opis Kereja Raya (JKR) Bintulu enggau kontriktor JKR datai ngabas penusah nya.

Nambahka jaku iya, ku Kenedy, naka ke diatu, JKR udah ngasuh kontriktor ngaga jalai sementara dulu ngambika bisi dikena peranak rumah panjai nya ngelayang.

“Seraya kitai nganti projek ngaga jematan ‘bailey bridge’, kitai udah ngasuh kontriktor ngaga jalai sementara dulu ba ditu.

“Jalai tu deka dikena peranak rumah panjai ngelayang sebedau projek jematan tembu,” ku iya madah baru.

Berebak enggau tu, iya mega beterima kasih ngagai sida ti bekaul ke udah meri kerejasama ngiga chara dikena mutarka penusah nya.

NGABAS: Kenedy enggau Wilson Ugak datai ngabas penusah ke nuntung Rumah Raymund, ensana.