Ensera: Apai Sali merau ngena kerubung lelabi

Tusun 1

Tumu pagi siti Apai Sali enggau anak iya ngaga bubu laban ti ka ngulihka ikan tegal nadai utai ke lauk sida menyanak. Sehari hari seduai menyanak begagaka bubu ba babas din lalu semua bubu ke ulih gaga seduai iya nya seratus iti.

Lalu siti ari bubu ti digaga iya nya pengabis besai ari semua bubu bukai. Nyadi pemesai bubu nya, iya nya umbas alai Apai Sali empu bediri lalu peninggi datai ba sadau rumah panjai sida.

Hari pan nyau ngalih alai Sali seduai Apai iya lalu mupuk ngagai sungai ti ka alai seduai iya nan ka bubu ti udah tembu di gaga seduai nya tadi.

Tan seduai iya bubu nya ari ulu mansang ke ili lalu chara Apai Sali nan ke bubu nya nyelai bendar iya nya mua bubu di tungga ke iya ke ulu lalu burit bubu nya di tungga ke iya ke ili.

Iya meh bubu seduai menyanak nyau tembu di tan lalu hari pan nyau malam. Batang sungai ke alai seduai menyanak ngenan bubu pan nyau deka apus ga alai seduai iya ngetan ke semua bubu seratus iti nya.

Pengarang Ensera – John Adam Gilbert Anyai

Ukai anchi anchi pemanjai batang sungai ti alai Sali seduai apai iya nampun ke semua bubu seratus iti nya tadi, lalu nyau ka enda alah seduai iya nembu ka tampun bubu nya. Nyadi bubu ke pengabis besai nya di tampun ke seduai iya ba nanga sungai.

Nyadi nanga sungai tu tadi benanga ba tasik besai. Sepenembu seduai iya menyanak nan ke bubu ti pengabis besai nya Sali seduai apai iya lalu mulai kediri ke rumah laban nangi enggai kediri enda ulih pulai ti hari nyau majak petang serta malam.

Datai Sali seduai apai iya di rumah, dia indai Sali ti benama Enchelegit lalu beguai berapi ke sida tiga menyanak enggaika laun makai lemai.

Nama agi deh naka iya penyampat iya nanggarka asi sereta bepandukka lauk. Asi ke ditanggar pan mansau, sida tiga menyanak lalu belabuh makai lemai.

Udah badu makai lemai, dia Apai Sali lalu nindok ka diri laban ti udah kelalu lelak begagaka bubu sereta nampunka semua bubu seratus iti nya ba batang sungai semak alai seduai iya nampunka bubu.

Tambah mega iya ti beguai tinduk nya ngarapka diri tau bisi bulih mimpi manah udah ti bekau seduai iya nampunka bubu lemai nya tadi. Iya ngarap ke semua bubu ti ditampunka seduai iya Sali nya bulih ikan mayuh pagi ila.

Tak enda berasai laban ti kelalu lelak sereta jenak dia iya lalu tekenyit sereta tedani laban ninga manuk mengkukuk nandaka hari nyau teberingkas tawas.

“Apu Duat dani ! Tawas hari tu anak, aram tua mupuk ngabas bubu ti ditampun tua kemari,” ku Apai Sali ngerak Sali enggaika seduai iya laun mupuk sereta enda tebuatka semua bubu ti ditampun seduai iya lemai kemari.

“Manah bendar mimpi aku malam tu tadi, tak bemimpi asai ke diberi orang buah rampu dua lanji,” ku iya.

“Aram meh apai, ngichaka bubu tua nya lagi bisi bulih ikan” pia deh ku saut anak iya, Sali.

“Oh Indai Duat! Nuan berapi lagi anang ngena periuk ke mit ke suah dikena kitai tiga nya tang tanggarka nuan sampau ke besai nyin.

“Nya kena nuan berapi enggaika asi empa kitai tiga lagi enda umbas,” ku Apai Sali madah ngagai bini iya, Enchelegit.

Udah nya Sali seduai apai iya lalu mupuk nurun ka batang sungai. Datai seduai iya ba batang sungai dia seduai iya lalu dulu ngabas bubu berengkah ari ulu, indah enda baka gaya seduai iya ti ngetanka tampun bubu nya kemari.

Nyah, lalu diangkatka Apai Sali bubu ti keterubah mampul pengabis ulu bendar tang lalu nadai ga bulih ikan.

“Oh! Iga ga petara enda ngalihka burit bubu aku ngasuh bulih ikan,” pia ku jaku Apai Sali nya tadi.

Udah nya datai ba bubu ti siti, lalu di angkat ke iya tang nadai ga bulih ikan. Nama agi nyau bejaku kediri Apai Sali.

“Akai apai! Akai indai! Iga ga ikan tu tak bangat enggai tama ngagai bubu tua deh anak. Eh bula bendar ga mimpi aku malam tadi,” pia ku iya bejaku ngagai Sali ti nyau gisai-gisai diempa kerengit ba tebing sungai nya.

Datai seduai iya ba bubu siti muakka ari ili nya nadai ga seduai iya bulih ikan. Nama deh utai ke ulih seduai, iya ga semina daun sereta rau aja ke bisi ngemenuhka bubu seduai.

Laban bubu ke ditampunka seduai iya mua nya di tunggaka ulu. Bubu pan nyau abis diangkat ke seduai ari tampun tang siku ikan pan nadai ga ulih seduai iya lalu ka tinggal bubu ti pengabis besai nya aja ti bedau diangkat seduai iya Sali ari tampun ba nanga sungai nya.

Lebuh seduai iya Sali nyau datai ba nanga batang sungai nya, dia Apai Sali pan lalu beguai ngangkatka bubu ari tampun nya.

Diangkatka iya enda ga ulih, lalu diujika iya baru ga ngangkatka bubu nya enggau naka pengering tulang iya empu tang lalu bedau ga ulih angkat ari ai.

Nyau ke puas tudah Sali meda apai iya nyau kual-kual nguji ngangkatka bubu nya kediri dia Sali lalu terejun ke ai nulung apai iya ngangkatka bubu nya ari tampun.

Tak nyau bebendar sereta seput-seput seduai iya menyanak ngangkat ka bubu nya, nya baru bubu nya tadi ulih diangkatka seduai iya.

Nama agi deh tak nyau semina ke enda luput seduai iya abis ati tekenyit meda ai nyau besimbur laban siku lelabi ti naka iya pemesai mesai tama dalam bubu ti ditampunka Sali seduai apai iya nya tadi.

Pemesai lelabi nya, iya nya kerubung kering serrta lalu ngaum kapir nyau bulih tiga depa. Lalu pala lelabi nya nyau besai agi ari buah embawang. Sali pan lalu manjung ketegal ti kelalu gaga.

“Apu apai! Besai amat lelabi ulih bubu tua tu deh,” ko iya.

“Eh ukai nya lelabi deh anak, daun mengkubung nya iga ga nuan enda ngelala,” pia ku Apai Sali ngemulaka Sali.

“Ukai nya daun mengkubung deh apai, endang tak lelabi nyengenda raya nya. Peda nuan iya nya ngerayap deh,” pia ku Sali ga madah ngagai apai iya ti agi benung nanka bubu nya tadi.

“Kati ku enda ngerayap deh, bubu tu ga digusak aku, daun mengkubung nya, ukai utai bukai endang tak nyata daun mengkubong,” pia ku Apai Sali ga ngemendarka jaku diri bebulaka Sali.

Lebuh Sali enggau apai iya datai di rumah, dia Apai Sali lalu beguai bekindu laban ti udah kelalu chelap berendam ba ai sepagi nya sekumbang ti ngabas bubu, nyau getar-getar tudah Apai Ali tu nat kediri chelap.

Lebuh iya ti bekindu nya dia iya lalu sengaja nunu iku sirat iya ba api ti alai iya bekindu nya, iya lalu madah kediri pedis perut sereta lalu ngasuh Sali ngambi kayu ba para enggau duku ke dikait ke iya ba tisi para.

Sali pan nanya iya kena iya apa kayu enggau duku nya deh ti ka mansang bira. Apai Sali lalu madah ke kayu nya ka ke sengkilu iya lalu duku nya ka kena iya melah kayu nya nyadi ke sengkilu ambika mit agi.

Tang iya ke bendar kayu nya ka di kena iya menyadi ke api laban api udah bisi ba iku sirat iya lalu duku nya ka dikena iya ngelampang lelabi ke ulih seduai iya Sali ke dikumbai iya daun mengkubung.

Betampung….