Entara strategi kimpin Manyin ngena surat

SERIAN: Adun Tebedu, Datuk Amar Michael Manyin Jawong deka ngena surat ngerembaika penerang ngagai rayat ba konstitusyen iya entara strategi bekimpin mata Pengawa Bepilih Nengeri (PRN) ke deka datai.

Ku iya, kebuah pia laban rayat ba menua pesisir nadai ulih meda media rama ketegal penanggul arus penyambung kelimpah chara baru ketegal pengerekai Covid-19 ti ngeruga mayuh pengawa.

“Aku deka ngena pamphlet ngambi ulih berandau tauka meri penerang ngagai rayat.

“Kami udah ngereja pengawa ke sama ngagai raban bansa Bidayuh sebedau tu ke alai genap ketuai bilik diberi pamphlet tu ngambi nerang baka kebuah sida patut milih Barisan Nasional (BN),” terang iya.

Manyin mansutka jaku nya ba aum pemberita pengudah bejadika Gerija St Paul Kampung Tema Saan ti udah tembu dikemanah, ditu kemari.