KUCHING: Dato Wan Abdillah Edruce Wan Abdul Rahman ensiban enggau ulah ex-lecturer Dr Abang Ahmad Ridzuan Abang Awit kelalu tumu ngalahka diri taja kelang endur bepadan bedau dibuka.
Wan Abdillah ke mega chalun Parti Sarawak Bersatu (PSB) sitak Kunsil Nengeri (DUN) Lingga madah, genap juluk pengawa begunaka pengeransing enggau ati ke lurus dalam nulung rayat.
“Enti deka nulung rayat mesti enggau ati lurus sereta anang bisi agenda kediri,” ku iya.
Wan Abdillah madah, Abang Ahmad enda ibuh madah diri nyurutka diri laban chalun PSB ungkup sitak Dun Beting Maro bedau dibantai.
“Iya madah diri deka nyadi chalun tang enda ulih mandangka pengulih diri.
“Berapa kali kini iya udah ngabas rayat ba Beting Maro? Mayuh kedalih diberi lebuh ditanya nyentuk ‘team’ ke ditumbuh nanya dini iya nadai ngabas rayat,” ku iya.
Kenu ku iya, enti deka mujur ba sesebengkah bidang begunaka chara kediri ukai ngandalka tulung ari orang bukai gawa.
“Surat ke dianjung ngagai presiden parti patut resia enggau enda ibuh dibantai nyau baka ke minta orang kasih.
“Kebendar utai ke digaga iyua nya mandangka sapa iya empu. Anang rindu ngiga penyalah orang bukai lalu peda cheremin,” ku iya.
Wan Abdillah mega ngangkaika tuju Abang Ahmad ngereja ulah ke baka nya laban Pengawa Bepilih Besai Ke-12 (PRN12) majak semak.
“Ulah ngamahka nama diri udah suah nyadi lalu bisi orang deka nyadi chalun kempang ngereja sebarang utai,” ku iya.
