Ai Tuak, sebansa ai tapai ti enda tau ditinggal lebuh bansa kitai Dayak ngintu Pengerami Gawai Dayak laban ai nya kelai ngintu pengerami.
Taja mayuh bansa ai bisa bukai bisi disedia ba pasar, baka ai bia, ai langkau, ai wine enggau ai bisa bukai, tang ai tuak enda tau enda tinggal.
Ku tuai, nyema ai tuak nadai disedia ba sebuah rumah tauka ba sebuah bilik di rumah panjai, rumah tauka bilik nya enda deka ditama Petara.
Ai tuak deka disedia lalu disempulang enggau penganan jala ba atas taba ti dibalut ngena Pua Kumbu.
Jeman majak mansang ngasuh ai tuak majak dikelala mensia mayuh lalu bisi mega sekeda orang udah nguji bejual ai tuak nengah chara komersial.
BEMACHAM BANSA
Ungkup penerang nembiak rebak baru, ai tuak asal digaga ari pulut burak tang diatu ai tuak ngembuan bemacham bansa.
Nya nyengkaum tuak buah anggur, tuak roselle, tuak nanas, tuak apple, tuak malberi enggau ke bukai.
Semua nya empas ari pemansang ai tuak ti majak tebilang ba nembiak rebak baru diatu.
Bisi mega sekeda orang udah ngaga koktel ai tuak, iya nya sebansa ai manis bisa ti dichampur enggau ai tuak ke suah diirup ba bar enggau ba palan pemerindang.
Nya alai, nyerumba Festival Pemakai Kuching 2023 beserimbai Pengerami Hari Gawai ti diatur Pesaka Asal Kulinari enggau Gerempung Seni Sarawak (CHASS) ba sebuah palan bebeli barang kena 14 Mei tu tadi, sida udah ngatur Pekit Ngaga Koktel Ai Tuak.
Pekit nya nerima timbal manah ari rayat di menua tu, kelebih agi nembiak rebak baru ti ngembuan pelajar hotel enggau dagang temuai.
Rambau pekit nya, dua iku indu beumur 21 taun mujur bekunsi gela champion Pekit Ngaga Koktel Ai Tuak.
Indu ti keterubah iya nya siku nembiak ari Universiti UCSI ba bidang Hospitality Management iya nya Eunice Teo Ee, ke alai indu ti kedua siku pengaga ai koktel ba sebuah bar iya nya Sylvia Lim Zi Wen.
ENDA NGADANG
Seduai bela bekunsi gela champion rambau pekit nya laban mujur ngaga ai koktel tuak ti nyamai.
Ku Eunice, iya berasai gaga laban enda nyangka ulih bulih gela champion.
“Pengelicha aku madah bisi pekit ngaga koktel tuak ba palan tu, dia aku nguji, tambah mega aku sigi rindu ngirup ai tuak.
“Tuak tu sebansa ai tapai ti nyamai, bisi orang ngaga manuk sumai kachang ma ngena ai tuak laban ai tu manahka pengerai lalu ulih ngasuh tubuh kitai bepeluh.
“Sekeda rempah ti dikena aku ngaga koktel tuak tu baka kayu manis, lia enggau selali,” ku iya.
Nangkan nya, Sylvia mega madah, iya enda nyangka bulih gela champion lebuh masuk pekit laban iya endang rindu nguji peneleba baru.
“Aku endang bisi peneleba ngaga ai koktel, tang tu keterubah aku ngaga koktel tuak.
“Terima kasih ngagai raban pengatur laban nyendiaka peluang besai ngagai kami ngasai peneleba baru,” ku iya.
Bae pekit nya mega, seduai mai pulai perais mata duit RM500, trofi enggau perais bukai.
Nyelai iya, ba pekit nya nadai penyereta bulih lumur dua, tang semina bisi penyereta bulih lumur tiga ti diempu siku tukang ngaga koktel sebuah bar.
Bala temuai dipebasa ti bisi datai rambau pekit tu iya nya, Datuk Bandar Kuching Selatan Datuk Wee Hong Seng, Chairperson CHASS Datin Dona Drury Wee enggau ke bukai.
