KUCHING: Menteri Kanan Kereja Raya, Datuk Seri Fadillah Yusof ddiatu suman ari igi penyakit Covid-19 pengudah peresa chulit ke pemadu baru mandangka pemutus negatif.

Ku Kaban Parlimen Petra Jaya nya, iya udah gawa baka selama pengudah abis timpuh kuarantin.

“Ungkup penerang semua, aku udah peresa chulit ba hari keenam maya timpuh kuarantin enggau ditukuka negatif.

“Tang, aku tetap ngasika Atur Pengawa Standard (SOP) neruska kuarantin nyentuk abis timpuh kuarantin ke udah ditetapka Palan Matau Gaya Covid-19 (CAC),” ku iya nerang ba laman Facebook, ditu kemari.

Pia mega ku Fadillah, iya udah beperesa baru kena Hari Dua tu tadi lalu mega ditukuka negatif.

“Opis menteri aku semampai peresa chulit nyau deka ninting minggu maya pandemik tu.

“Aku nadai ngasaika pemedis tauka kelai sekumbang dalam kuarantin.

“Aku meri besai terima kasih ngagai sida ke udah besampika aku jampat gerai lalu diatu aku nadai apa nama kuarantin di rumah,” ku iya nerang.

Nambahka nya, iya ngelalau mensia mayuh semampai ngasika SOP dikena nagang igi penyakit Covid-19 lalu rejister betuchuk vaksin enggau lengkas.

Dulu ari nya, Fadillah ditukuka positif Covid-19 pengudah nerima pemutus peresa ti suah dipejalai opis menteri iya kena 10 June tu tadi.

Iya kuarantin di rumah laban nadai mantaika kelai nitihka sanding penemu ari Opis Menteri Pengerai Malaysia (KKM).