KUCHING: Sepenyampau 300 iku raban terabai komuniti ba Palan Meri Vaksin (PPV) Stadium Perpaduan Kuching nerima buah nengah Program Opis Menteri Betanam Betupi enggau Industri Pemakai (Mafi) Prihatin, ditu kemari.
Sapit Kepala Menteri, Datuk Amar Douglas Uggah Embas madah, Perintah Sarawak meri besai terima kasih ngagai Kaunsil Makit Betanam Betupi Perintah Besai (Fama) Sarawak enggau Gerempung Orang Bumai Pelilih Menua (PPK) Kuching, Samarahan sereta Siburan laban udah nyuaka pemeri
“Pemeri buah deka meri semengat ngagai raban terabai komuniti ditu (PPV Stadium Perpaduan Kuching) laban sida udah bebendar nentuka program betuchuk vaksin lanchar dipejalai.
“Aku gaga ati laban makin mayuh orang datai nerima vaksin ninting hari taja kala napi mayuh penanggul tang diatu program nya lanchar dipejalai,” terang Uggah ngagai pemberita.
Uggah mansutka jaku nya pengudah nyuaka pemeri buah Mafi Prihatin ngagai raban terabai komuniti di PPV Stadium Perpaduan, ditu kemari.
Entara buah tu iya nya semangka Black Lady ke mega asil ditanam PPK Kuching, nanas Moris (PPK Samarahan), pisang otel (PPK Siburan enggau Ladang Kunterik Fama) enggau buah kasai (Ladang Kunterik Fama).
