Fenny Lynn, 48 siku penanyi veteran ari menua Bintulu ia mega benung mangku pengawa nyadi Tuai Rumah ba pelilih menua Sebungan, Sebauh, Bintulu datai baru ngerichahka industri pemerindang lagu Iban.
Ungkup penemu, Fenny tu kala mansut ke lagu ngena kaset jeman 90an kelia.
“Aku kala mansutka tiga iti album siti album kompilasyen dibaruh perabung Serikat TBC (Tiew Brother Com) lalu album keterubah digaga bepadu nyawa enggau penanyi Edwin Anthai.
“Bala peminat ti rinduka lagu ari aku tu ulih meda ba channel Youtube diberi nama Pengerindu Enda Berubah enggau Jadi Mali, “ ku iya madah nengah sebengkah penerang nuju Ruai, Suara Sarawak.
Nangkan ke nya, Fenny madah dalam taun 2019 iya sekali agi nyingkang agai dunya pemerindang sepengudah diau jenuh ketegal pengiruh ngatur ruang bilik diri.
“Ba taun 2019, aku enggau bala raban ari Serikat Irama Sibu betuaika Aya Lacau Bejembi tauka David A Kemay ngaga siti lagu kompilasyen Gawai diberi nama Gawai Ngemali Umai.
“Ba album nya suba, aku bisi nyadaka leka ramban,” ku iya seraya madah ba taun ke sama iya bisi mansutka sebuah lagu solo ba Youtube diberi nama ‘Semina Tinggal Kenang’ ditengkebang iya empu.
Udah nya, Gawai taun tu tadi kami sebuah ari Serikat Irama bisi ngeluarka lagu Gawai dikena mensia mayuh beperindang, ku iya.
Nangkan ke nya, ngelansa pekara bekaul Fenny madahka juluk ati diri deka mansutka lagu kompilasyen ba ujung taun tu.
Pia mega ngelansa pasal lagu baru ari iya ke diberi nama Punggu Saum Penepan. Fenny madah lagu tu ditengkebang komposer biak Stanly Jeffery lalu tiun iya digaga Sony Jang.
Lagu nya ngenang cherita siku pangan lelaki iya nguji deka bekunsi pengerindu, ku iya seraya meri terima kasih besai ngagai Stanly laban udah ngaga siti lagu ke chukup manah.
Fenny mega meri terima kasih ngagai sida sebilik enggau kaban belayan ke seruran meri sukung ngagai iya nyentuk ulih ayan baru ba dunya pemerindang Iban.
“Arapka peminat lagu Iban terus betunggang sukung ngagai industri pemerindang kitai Iban,” ku iya ba pengujung penerang nya.
Bala peminta ti deka meda lagu Fenny ba Youtube ulih ngiga nama lagu Semina Tinggal Kenang, Anang Ninding Maya Gawai, Pekit Sigat Tuai enggau Ramban Begagai.
