KUCHING: Gerempung Autisme Kuching (KAA) mujur nyapai tagit ngumpul belanja RM300,000 dikena palan tu nengah Festival Pemakai enggau Bejual Pengasih 2023.
Chairperson Pengumpul Belanja KAA, Connie Yeo Chia Lin madah, nya siti rikod baru ke dijapai sida laban mujur ngulihka belanja ngelui ari penyampau ti diselinting.
“Sebedau pandemik COVID-19 pen kami bedau kala nyapai penyampau ngemayuh tu, penyampau pemadu mayuh kala diulih kami suba urung RM250,000.
“Nya alai, kami chukup gaga enggau meri terima kasih ngagai komuniti sereta semua ti mantu meri tulung ngemujurka program ngumpul belanja tu,” ku iya.
Connie bejaku munyi nya lebuh ditanya pemberita rambau Festival Pemakai enggau Bejual Pengasih KAA ba Gerempung Gerija di Sarawak, ditu tadi.
Ku iya, penyampau semua belanja ti digumpul bedau ulih ditentuka nyentuk program tembu, taja pia iya pechaya belanja ti digumpul tu udah ngelui ari RM300,000.
