Filem badas bepun ari pengelandik penulis skrip

Mayuh kitai ke udah nemu berita pasal pemujur filem Dayak Belaban Hidup : Infeksi Zombie ti menang empat bengkah anugerah filem ba renggat entarabansa tentu berasai temegah ati laban tu mega udah nyaup ngangkatka jaku, budaya enggau nama menua tu dikelala ba menua luar.

Empat pemujur filem tu iya nya keterubah nengah Karnival Filem Dunya Singapura menang Kategori Cherita Berantu Pemadu Manah enggau Sains Fiksyen, kedua ba Festival Filem Seni Lambang Entarabansa di Rusia (Kategori Cherita Berantu Pemadu Manah) ditangkan ba Festival Filem Paris di Peranchis (Kategeri Cherita Berantu Pemadu Manah) enggau ba Festival Filem Diversiti Kanada (Kategori Cherita Filem Pemadu Manah).

Tang taja pia sebedau nyapai pemujur ba tikas chukup tinggi baka nya, arapka bala kitai berunding lalu belematika pemedis enggau pemar ke udah ditapi raban pengeluar filem dikena nyapai siti pemujur ke chukup besai baka ke udah dipeda diatu.

Semua nya begunaka pengeliat ati enggau pengepuh lalu pekara nya diaku pengeluar ke mega penulis skrip filem tu empu, Misha Minut lebuh iya mansutka penemu ngagai Suara Sarawak sereta bisi ayan ba berita Ruai sebedau tu ba sentang ungkus belanja dalam ngemujurka filem tu.

Enti beratika ari empat bengkah anugerah ke udah dijapai filem Belaban Hidup : Infeksi Zombie naka tu dia kitai meda pemujur nya mayuh agi bekaul enggau pemanah jalai cherita filem tu empu.

Taja pan aku empu bedau meda filem tu tang ari sukut kategori anugerah ke udah ke udah dijapai enggau pekara ke udah dikunsika pengeluar sereta direktor filem enggau bala media dia kitai ulih nyimpulka pamanah filem tu endang bepun ari pengelandik penulis skrip kelimpah pekara bukai ke bekaul.

Jalai cherita filem Belaban Hidup : Infeksi Zombie tu iya nya ngenang pasal seraban anak patu balu ke dikurung nyadi kereban pansik siku sainstis gila lalu digembar enggau kisah berantu sereta aksyen raban bujang berani Dayak beserakup ngelaban bala antu Zombie.

Sebedau cherita tu dilakunka baru awak ke nyadi sebuah filem dia Misha dulu ngaga skrip dikena ngemuntangka pengawa ngaga video enggau proses editing. Skrip filem tu tau disemaka kitai baka entukar ke ditepan dikena kitai ngenataika diri ngagai adan ke dituju.

Ari skrip mega orang ke nyadi produser filem ulih nemu berapa ungkus belanja, penyampau pelakun, baga siku-siku pelakun ke dipilih, kereban ke diguna dikena belakun enggau mayuh agi pekara bukai ke bekaul.

Nyadi baka ni pendiau skrip ti badas lalu nama pekara ke patut bisi dalam sebuah skrip filem?

Semua tu mesti dipelajarka dulu ba siku-siku orang ti deka nyadi penulis skrip filem ti badas awakka skrip ke dibantai ulih narit ati produser tauka orang ke disadang ulih mantu meri belanja dikena ngemujurka sesebengkah skrip tadi nyadi sebuah filem.

Ari penemu ke udah digempuru dalam skrip ke tembu digaga nya, dia penulis skrip mesti bisi kreativiti tauka pengelandik ngerembaika buah penemu nya ngambika dipeda bebida ari enggi orang bukai tauka pengujung pekara ke nyadi enda disadang orang ke baru filem nya.

Kelimpah ari nya, penulis skrip mega mesti ulih ngatur pengusut runding lebuh bejalaika pengawa. Kebuah pia, laban buah penemu ke baru deka seruran datai enggau patut diserenih.

Nangkan ke nya, ulah orang ti deka nyadi penulis skrip ti badas mega mesti bisi disiplin enggau semangat. Pengawa nulis enda ulih betangguh, laban awak enggau jam seruran bejalai. Semangat tauka pengeransing ati enda tau jauh ba runding sida. Penulis skrip ti nadai teibunka ulah tu deka ngujungka skrip sida tepagang ba setengan jalai.

Nya alai, kitai ngarapka agi bisi peranak Sarawak udah tu ulih nitihka singkang Misha Minut mujur ngasilka skrip filem ke badas sereta mujur teulihka pemujur ba tikas anugerah filem ke pemadu tinggi.

Dua chunto skrip filem ke chukup manah sereta mujur diangkat nyadi filem ti pegari dikelala ba serata dunya sebedau tu iya nya skrip filem ‘Star Wars’ enggau ‘Harry Potter’.

Suara Sarawak