“Filem Belaban Hidup kedua deka digaga dikena ngangkatka budaya Dayak.” – Misha Minut

KUCHING: Arapka Filem Belaban Hidup kedua nyadi nyata lalu ulih ngangkatka jaku enggau budaya Dayak datai ba tikas dunya.

Nya mih juluk ati Misha Minut lebuh dirandau Suara Sarawak pengudah filem Belaban Hidup: Infeksi Zombie bulih Anugerah Filem Pemadu Manah ba Canadian Diversity Film Festival.

Tu keempat kali filem ditengkebang begulai Misha enggau Ray Lee nya menang anugerah ba tikas dunya.

“Besai amat pengandal aku perintah ulih meri agih belanja ngambi juluk ati tu nyadi nyata ila.

“Kitai sama nemu, nadai mayuh filem Dayak ulih dikeluar sebedau tu laban napi penanggul kelebih agi ari sukut belanja.

DIAKU DUNYA… Filem Belaban Hidup naka diatu udah bulih empat anugerah ba tikas dunya.

“Nya alai, ari pemujur filem tu dikearap ulih ngerandang jalai ngagai bala pengeluar filem Dayak ke bukai lalu nyadika peransang ngagai sida,” ku Misha mantaika pengandal diri.

Iya madah, juluk ati keterubah deka mai filem Dayak dikelala enggau diaku dunya udah tejapai lalu diatu deka meda mayuh agi orang nitihka singkang nya.

Ambika chunto, tuju filem Belaban Idup nya empu dikena mantaika budaya; daya idup enggau pekara rama raban bansa Dayak ngambi dikelala menua luar.

“Pemujur filem tu mega sebagi ari pengawa kami mandangka budaya bansa Dayak ngagai serata dunya.

“Ari filem tu tadi, mensia mayuh ba serata dunya ulih beratika budaya Dayak di menua tu,” ku Misha nerang.

Ku iya, Filem Belaban Hidup tu cherita berantu lalu bisi mandangka pengidup enggau budaya Dayak ti ngasuh filem tu ngembuan penyelai.

Iya mega madahka filem tu nyelai laban mandangka bujang berani Dayak ngena ngepan asal ngelaban antu zombie.

“Filem Belaban Hidup tu mega seninjik amat dibantai laban sama baka penusah ti ditapi kitai diatu ngelaban pandemik Covid-19.

“Enggau peluang tu, terima kasih nuju bala ti udah ngenataika jaku pengaga ati lebuh Filem Belaban Hidup tu nerima empat anugerah ba tikas dunya.

“Jaku puji kita nya meransang kami ngaduka mayuh agi filem Dayak dudi hari ngambi kitai sama ngangatka adat enggau budaya kitai ngambi adat nya terus idup,” ku Misha madah baru.

Iya mega madahka diri enda nyangka bulih empat anugerah nya tang ba Misha empu, anugerah nya nyadi peransang ngaduka filem Dayak bukai ila ti ngembuan tuju ngangkatka adat enggau budaya kitai.

“Semua pengelelak enggau pengiruh sekumbang ngaduka filem tu udah tebalas,” ku Misha gaga meda Filem Belaban Hidup majak diaku ba tikas dunya.

Dulu ari nya, Filem Belaban Hidup mujur nerima tiga anugerah baka Best Horror di Wolrd Film Carnival Festival Singapore, Best Feature Horror and Best Film di Russia sereta Festival Filem Paris di Peranchis.

MENANG BARU… Filem Belaban Hidup: Infeksi Zombie mujur bulih anugerah Anugerah Filem Pemadu Manah ba Canadian Diversity Film Festival.

Suara Sarawak