Filem Dayak champion di Singapura

KUCHING: Sebuah filem bepelasarka Dayak ke diberi nama ‘Belaban Hidup: Infeksi Zombie’ mujur nyadi champion ba renggat entarabansa Kategori Berantu enggau Sains Fiksyen ba Karnival Filem Dunya (WFC) Singapura 2021.

Ngelansa mimit pasal filem Belaban Hidup tu, dia bala pelakun filem tu bisi ngena dua bengkah jaku iya nya jaku Iban enggau Melayu sereta aksyen belaban.

Pengeluar enggau direktor filem tu Ray Lee, 45 taun madahka filem nya digaga taun 2016 lalu bekerejasama enggau penulis skrip ari Limbang, Misha Minut.

“Filem tu nyelai laban mandangka adat enggau main asal bansa Dayak kelimpah ngena jaku Iban ba sekeda dialog,” ku iya nerang ba sebengkah portal berita Bernama.

Filem ‘Belaban Hidup: Infeksi Zombie’ dikeluarka Hornbill Films Sdn Bhd enggau Harry Aziz Entertainment Sdn Bhd lalu dipelanja Gerempung Pemansang Filem Nasional Malaysia (Finas).

Entara pam cherita dalam filem enggau raban kru ti ngemujurka filem ‘Belaban Hidup: Infeksi Zombie’.

Filem ti deka diidarka Metrowealth Pictures Sdn Bhd tu dipelaba deka dipandangka ba panggung wayang menua tu ujung taun tu ila.

Ngelansa mimit, filem tu nyeritaka pasal seraban nembiak patu balu ti dikurung nyadi kereban pansik siku sainstis gila.

Pia mega, filem tu bisi ngaul elemen berantu enggau aksyen belaban entara bala Dayak di Sarawak.

Entara bala pelakun filem ‘Belaban Hidup: Infeksi Zombie’ iya nya Pekin Ibrahim, Altimet, Pablo Amirul, Anna Melissa, Cassidy Panggau, penanyi Indonesia, Tegar enggau pelakun ari Slovakia, Katrina Grey.

Kelimpah ari nya, Lee mega madahka filem tu mega bisi dichalunka ba International Symbolic Art Film Festival di Rusia ungkup kategori filem pemadu manah enggau filem berantu pemadu manah kena 27 March tu ila.

Rambau dirandau terus ba ruai Facebook Borneo Channel apin lama ke udah dia Ray ngarapka filem tu dipasukka nyadi chalun dalam karnival filem entarabansa ke bukai baka di Amerika Syarikat, United Kingdom, India, New Zealand, Australia, Jipun enggau Paris dalam beberapa bulan ke deka datai.

Entara pam cherita dalam filem enggau raban kru ti ngemujurka filem ‘Belaban Hidup: Infeksi Zombie’.

 

Entara pam cherita dalam filem enggau raban kru ti ngemujurka filem ‘Belaban Hidup: Infeksi Zombie’.

 

Suara Sarawak