Filem Dayak menang baru di Rusia malam tadi

KUALA LUMPUR: Filem ‘Belaban Hidup: Infeksi Zombie’ menang baru ba tikas entarabangsa ba kategori Filem Pemadu manah enggau Filem Berantu Pemadu Manah ba International Symbolic Art Film Festival (ISAFF) di St Petersburg, Rusia, malam tadi.

Nitihka penerang ari laman berita Bernama, Direktor iya Ray Lee, 45 meri terima kasih enggau pemujur nya lalu madah diri chukup temegah laban udah ngangkatka nama Malaysia ba tikas entarabansa.

“Tu pemujur ungkup semua. Terima kasih enggau kelai basa tu. Kami ngarapka pemujur tu deka nyadi peransang ngagai semua pemain filem biak ke bukai awakka enda mudah tepantup ati ngasilka karya kreatif dikena ngangkatka nama menua,” ku iya madah ngagai Bernama.

Dulu ari tu, filem ke dikeluarka Hornbill Films Sdn Bhd enggau Harry Aziz Entertainment Sdn Bhd tu udah nempa sejarah pengudah dipadu menang kategori Berantu enggau Sains Fiksyen ba genre filem cherita pekit World Film Carnival Singapore 2021 kena 18 March tu tadi.

Berebak enggau nya, ku Ray filem nya mega udah dichalun ba Los Angeles Marina Del Rey Film Festival (LAMDRFF) ba kategori Filem Cherita Pemadu Manah (Best Feature Film).

Belaban Hidup: Infeksi Zombie nyeritaka pasal seraban anak patu balu dikurung nyadi kereban pansik siku saintis gila ti nyerangkung kisah berantu sereta aksyen raban bansa Dayak di Sarawak.

Filem tu dipelanja Opis Pemansang Filem Nasional Malaysia (FINAS) lalu dikemujurka bala pelakun dalam menua baka Pekin Ibrahim, Altimet, Pablo Amirul, Anna Melissa, Cassidy Panggau enggau penanyi Indonesia, Tegar sereta pelakon peranak Slovakia, Katrina Grey.

Filem dikeluarka Metrowealth Pictures Sdn Bhd tu dipelaba deka dipandangka ba panggung wayang bulan Ogos ila.

Suara Sarawak