Filem ‘Sumpahan Jerunei’ dikearap meletup

Ungkup peranak Mukah, Jerunei siti palan ngubur raban pemesai bansa Melanau ke dipebasa tauka bala raja nyengkaum orang dagang ke seruran mantu rayat.

KUCHING: Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah ngarapka Filem Sumpahan Jerunei ulih meletup tauka nyapai tikas ‘box office’.

Digaga nengah kerejasama Perintah Negeri, Opis Menteri enggau One Filem Production, filem nya mandangka sejarah bansa Melanau Sarawak.

“Kitai ngarapka filem tu diterima rayat mayuh lalu nyapai tikas ‘box office’.

“Filem tu bisi digaga di Mukah, Siburan, Kampung Budaya Sarawak di Santubong enggau di Taman Dewan Bandaraya Kuching Utara(DBKU),”ku iya.

Iya mansutka jaku nya ngagai pemberita maya ngemata pengawa ngaga filem di Taman DBKU kemari.

Rambau nya, Abdul Karim mega bisi ngemujur sebagi ari lakun filem begulai enggau pelakun tebilang Uqasha Senrose.

Filem Sumpahan Jerunei ngayanka sejarah menya ke bekait enggau adat ngubur raban pemesai Melanau.

Ungkup peranak Mukah, Jerunei siti palan ngubur raban pemesai bansa Melanau ke dipebasa tauka bala raja nyengkaum orang dagang ke seruran mantu rayat.

Diatu, sejarah Jerunei tu ulih dipeda di Kampung Tellian Tengah, Mukah.

BEJADI…Datuk Abdul Karim Rahman Hamzah (kanan) begulai enggau bala bukai ngemujur filem ‘Sumpahan Jerunei’ tadi.