ARTIKEL

Filem Sumpahan Jerunei Turai sejarah raban bansa Melanau dipandang

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Filem berantu, Sumpahan Jerunei sebuah filem ti mandangka turai sejarah raban bansa Melanau bemalinka utai ti amat nyadi kelimpah ngelakuka penyelai Sarawak.

Filem ti mandangka sejarah ngelumbung bansa keempat pemadu besai ba Sarawak nya bemalinka pansik amat nengah kerejasama komuniti dia nyengkaum waris ketujuh peturun Melanau, Tommy Black Mark Lang ti bisi kaul enggau adat ngelumbung raban orang kaya Melanau ngena Jerunei.

Direktor Eksekutif Seni Duapuluh Duapuluh Sdn Bhd, Datin Dr Wendy Wong madah, raban sida milih cherita bansa nya nyadi filem laban deka komuniti dunya ngelala penyelai Sarawak.

“Tebal agi lebuh bejaku pasal Sarawak, mensia mayuh ngelala adat enggau main asal sereta sejarah komuniti Iban, Melayu enggau Dayak tang ukai bansa Melanau.

“Lebuh bejaku pasal Jerunei, tebal agi orang enda nemu senentang sejarah Jerunei tu nyengkaum komuniti Melanau empu.

“Filem tu bepun ari pansik digaga kami berapa taun sebedau pengawa ngaga filem dipejalai lalu asil pansik tu diatu bisi ba Muzium Sarawak,” ku iya.

Dr Wendy mansutka jaku nya ba aum pemberita pengudah Program Bejadika Pekit Ngaga Poster Filem Sumpahan Jerunei ba Universiti Teknologi Swinburne Sarawak, ditu kemari.

Ngelansa silik, ku iya, taja pen cherita berantu dibantai ba filem nya semina fiksyen aja tang pekara bekaul pengawa ngelumbung ngena Jerunei, perengka dikena enggau chara adat, kustom enggau ti bukai nya bemalinka utai ti amat ba Kampung Tellian Tengah, Mukah.

Lebuh dirandau senentang peneleba berantu maya ngaga filem nya ba taun 2019, ku iya, set ngaga filem nya kala rusak penuh ketegal kabut enggau ujan bangat.

“Maya tu kitai benung ngaga filem ba Kuching seraya benung ngangkatka tiang ngelumbung tu.

Enda memukai lebuh tiang tu baru deka angkat, ujan bangat enggau kabut lalu nyadi taja gaya hari chukup manah.

“Peneleba berantu ti bukai nadai laban sebedau kami ngaga filem, kami bisi besampi dulu dikena masa main asal komuniti tu,” ku iya.

Iya madah, filem nya dikena ngajar mensia mayuh senentang pengaya sejarah enggau main asal Malaysia nengah pengawa mantaika kelai sejarah, pesaka main asal enggau gaya idup ngagai komuniti dunya.

“Kelimpah ngelakuka Sarawak nyadi palan dagang temuai filem senentang sejarah enggau main asal, filem tu mega dikena ngelakuka menua nyadi palan dagang temuai ti tebilang.

Dikena ngintu pesaka Malaysia ba dunya ti majak maju lalu main asal enggau turai sejarah majak punas disegang pemansang, nya alai kami ngarap ulih ngetanka pesaka menua nya ngagai rebak baru.

Iya beterima kasih ngagai Perintah Sarawak ti nyukung sereta meri belanja dikena ngemujur filem nya nyengkaum Kaunsil Amanah Kebajikan Kaum Melanau, Gerempung Raban Bansa Melanau, Kaunsil Pekara Adat Sarawak (Mais) enggau semua ornag ti bekaul.

Ku iya, filem nya mantaika sekeda artis tebilang menua baka Ruminah Sidek, Uqasha Senrose, Bront Palaree, Syafie Naswip, Sabrina Hassan, Yuyun Hikmah enggau Daiyan Trisha deka dibantai ba wayang ujung bulan Julai tu.

Filem nya ngenang pasal seraban pemansik menua tu bejalaika pansik sejarah Jerunei lalu utai berantu berengkah nyadi lebuh tiang ngelumbung berengkah dikinsit ngagai endur bukai.

Ungkup rikod, naka diatu, enam tiang ngelumbung pesaka sejarah Jerunei agi meruan ba Kampung Tellian Tengah Mukah.

Pemesai Jerunei urung dua pemerap digaga ari kayu belian ti besai sereta agi meruan bediri taja udah manggai lebih 200 taun.

Dikena ngaga tiang ngelumbung, dua tauka tiga lubang meseti ditebuk ari baruh dikena nepu tubuh tauka tulang orang kaya ti udah midang enggau keresa berega ti nyadi bekal tauka piyou sida ba dunya bukai.

Ba luar tiang nya diukir ngena ukir jelu baka naga, remaung, ular, ukui, mayau enggau ti bukai bepanggai ba pemesai pangkat tauka ari peneka pengempu iya.

Pengawa ngaga Jerunei nya chukup lama.

BERITA LAIN

BERITA TERBARU