Fokus diatu ngidupka baru ekonomi menua

SARATOK: Pandemik Covid-19 ukai semina ngeruga pengerai enggau nyawa mensia mayuh tang mega ngujungka sektor ekonomi dunya balat kusut.

Sapit Menteri Pengeluar Kuasa enggau Pengeraja Asal, Datuk Ali Biju madahka manggai setaun lebih kitai udah napi penusah besai ti nuntung serap menua ngujungka rayat idup tasah.

Ku iya, fokus besai diatu ngiga chara pemadu semitan dikena nagang igi penyakit ari majak ngerekai enggau nabanka mayuh agi nyawa.

“Jaku dipansutka Menteri Besai nyemetak madahka kitai diatu nguing ngagai pengawa ngiga chara mutarka penusah dibai Covid-19, ngidupka baru ekonomi, nyaga pengelikun enggau ngintu pengelantang rayat.

“Ekonomi kitai majak manah diatu lalu tikas ekonomi tumbuh mega niki sereta penyampau tubuh sida ti nadai kereja bisi kurang dibanding taun sebedau tu.

“Pemutus muka sektor ekonomi berenggat ngambi rayat ulih bejalaika baru dagang enggau ngiga belanja mega mujur nyungkak ekonomi menua.

“Pia mega pemutus muka mayuh bengkah sektor enggau aktiviti dagang kandang diatu beguna amat dikena meransang ekonomi tumbuh,” terang iya silik.

Ali ti mega Kaban Parlimen Saratok mansutka penemu nya dikena nimbal jaku dipansutka Menteri Besai Tan Sri Muhyiddin Yassin beserimbai enggau genap setaun PN udah megai perintah, apin lama ke udah.

Iya madah, taja ekonomi dunya bisi kusut tang menua kitai chukup betuah laban bisi Pakej Peransang Ekonomi Siruka Rayat (Prihatin) dipejalaika perintah ti mujur mai ekonomi kitai ulih beretan.

Suara Sarawak