ARTIKEL

PUN INSPIRASYEN… Freda chukup elegen rambau bejalai ba atas panggau maya renggat kepenudi QOTW Sarawak empai lama.

Freda tegap penemu isu ‘body shaming’

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

PENGAWA bejai, ngemeli tauka beduan raras tubuh orang bukai (body shaming) ba sebelah media sosial kelebih agi ngagai raban indu ti ngembuan raras tubuh ti besai nya endang ulah ti enda beradat sereta patut diketu.

Nya pekara ti ditegika siku penyereta Mrs Queen of The Worlds (QOTW) Sarawak, Freda Kahang lebuh iya masuk pekit nya empai lama.

Taja pen enda bulih sebarang penuduk ba pekit nya tang iya tepantup ati udah mantai enggau meri penyedar ngagai mensia mayuh nengah pelasar nya.

NYADI INSPIRASYEN ORANG BUKAI
Ngembuan raras tubuh ti berisi (chubby) enda nagang iya ngaga pemutus berani masuk pekit QOTW Sarawak nya sereta besemekih enggau bala penyereta bukai.

Tuju iya masuk pekit nya ngambi ulih nyadi chunto enggau inspirasyen ngagai bala indu bukai ti ngembuan nasip sebaka.

Kelimpah ari nya, iya ransing meri penyedar ngagai mensia mayuh ngambi ngetu pengawa beduan siber nya.

Freda pechaya pemajik siku indu nya endang pekara subjektif lalu enda patut sepeneka ati ditentu ari sukut pemanah raras tubuh.

“Genap kitai bela bisi pengurang enggau pengelebih kediri empu.

“Taja pen kitai ngembuan tubuh ti berisi tauka gemu tang udah tentu kitai mega bisi pengelebih tauka pemintar ba sukut bukai.

“Lalu pia mega, sida ti ngembuan mua ti bajik sereta raras tubuh ti manah ukai bereti sida 100 peratus menyana laban udah tentu sida bisi pengurang enggau penimpang kediri empu.

“Pandak jaku, pemajik tu ukai semina datai ari luar tang ari dalam kitai empu,” terang iya.

KETU ULAH BEDUAN SIBER
Ku Freda, pengawa beduan raras tubuh orang bukai ba sebelah media sosial nya ukai pekara baru tang nya endang lama udah nyadi.

“Taja pen mayuh inisiatif udah dipejalai dikena meri penyedar ngagai mensia mayuh bekaul pengawa beduan nya tang ulah ti enda beradat tu majak nyadi.

“Anang kitai semina ngemeratka diri empu aja tang kitai patut betatika nasip sida ti dikeduan kitai enggau empas pekara nya ngagai pengidup sida!

“Nya alai, aku ngena pelasar QOTW Sarawak tu dikena mantaika sada enggau sebana raban nya ngagai mensia mayuh.

“Aku naka ulih meri penyedar ngagai mensia mayuh bekaul pekara tu lalu ngetuka ulah sida ti enda beradat nya.

“Nemu kita? Ulah nya ulih meri empas enda manah ngagai sida ti dikeduan nyentuk sida lenyau pengandal ati ngagai diri empu sereta malu betunga mua enggau mensia mayuh.

“Ukai naka nya aja, bisi sekeda napi penanggul kusut runding ti balat ketegal dikeduan kelalu iga sereta napi pemalu besai nyentuk sida sanggup munuh diri empu,” terang iya.

Iya nyemetak madah, pengawa beduan raras tubuh tauka pengurang tubuh orang bukai nya endang penyalah besai lalu ulih diukum ba baruh undang-undang.

Tandu iya, orang ti ngereja penyalah beduan nya sebaka enggau penyalah munuh nyawa orang bukai.

Nya alai, indu misi nya ngelalau mensia mayuh selubang penemu munas enggau nagang isu beduan raras tubuh orang bukai.

Iya madah, sukung penuh ari mensia mayuh beguna amat ba pengawa munaska ulah ti enda beradat nya.

Kebuah pia, ku iya, ngambi nadai agi orang indu nerima nasip sebaka sereta lenyau pengandal ati ngagai diri empu.

Freda mega ngelalau semua indu ti dikeduan baka nya ngambi ngembuan runding ti positif laban nya ukai ngemaruhka sida tang nyadi tungkat pengering dikena sida angkat mansang ke mua.

Ku iya, tubuh ti berisi nya endang nyelai sereta seksi.

NGEMBUAN MAYUH PENYULUT
Taja nadai bulih sebarang penuduk ba pekit nya tang Freda udah nyapai mayuh penyulut ba pekit ti baka nya.

Iya kala ngempu penuduk kedua ba Pekit Chubby Queen Sarawak sereta dirintai ba empat penyereta pemadu manah ungkup Pekit Ratu Kebaya Lundu.

Anugerah bukai ti kala diulih iya baka mujur dipasuk ba rintai lima penyereta pemadu manah ungkup Pekit Model Search Sarawak enggau Mrs Congeniality Queen of The World.

Kelimpah negika isu beduan raras tubuh, Freda mega chakah mantaika penyelai etnik Selako tauka Selakau ba mata dunya ari mayuh bengkah sukut.

Nya nyengkaum ari sukut tanda main asal, pemakai, ngepan, adat asal enggau ti bukai nengah pelasar pekit kumang nya.

Lebuh ngujung ke randau diri, iya beterima kasih ngagai pemelanja besai pekit nya baka Nottingheel sereta semua sida ti ngemujurka Pekit QOTW Sarawak.

Iya mega beterima kasihg ngagai Mrs Global Asian 2023, Kimi Tomas ti nyukung penuh sereta enda leju meri jaku peransang sekumbang iya masuk pekit nya.

BERITA LAIN

Sibu tuai rumah Sarawak Agrofest 2025

BINTULU: Sibu udah dipilih nyadi tuai rumah Sarawak Agrofest ba taun baru. Menteri Industri Pemakai, Komoditi enggau Pemansang Wilayah Sarawak, Datuk Sri Dr. Stephen Rundi

88 chalun STPM Sarawak bullh PNGK 4.0

INDUN SILONGsuarasarawak.sv@gmail.com KUCHING: Nengeri Sarawak ngerikod Purata Nilai Gred (PNGK) pemutus peresa Sijil Tinggi Persekolahan Malaysia (STPM) 2023 penyampau 2.69 enti dibanding PNGK STPM 2022

Sarawak ngerikod PNGK 2.69 ba peresa STPM 2023

KUCHING: Pemutus peresa Sijil Tinggi Persekolahan Malaysia (STPM) 2023 Sarawak ngerikod ‘Purata Nilai Gred Keseluruhan’ (PNGK) 2.69. Pemutus nya kusut ari taun 2022, iya nya

BERITA TERBARU