Gaga bup pasal ngepan Iban

“…nadai salah enti kitai bisi siti bup ti nerang pasal ngepan nya ngambika bup nya ulih nyadi malin nembiak rebak baru.”

BETONG: Komuniti Iban patut ngembuan siti sistem ti nerang pasal ngepan bansa Iban di Sarawak.

Pengelicha Palan Pematih Pengajar Miri (IPG) Dr Nelson Tandang madahka komuniti Iban meseti bisi gaga siti bup ti nerang mayuh macham bansa ngepan ti dikembuan komuniti Iban ari serata bagi menua ditu.

“Ba taun 2006, Jaku Iban berengkah dikena dalam sistem pelajar berindik ari kitai udah bisi bup ti nerang standard jaku dikena kitai.

“Nya alai, nadai salah enti kitai bisi siti bup ti nerang pasal ngepan nya ngambika bup nya ulih nyadi malin nembiak rebak baru,” ku iya.

Dr Nelson madah munyi nya lebuh bejuraika Tinjau Pemansang Ngepan Iban Jeman Dudi Ila ba Simposium Ngepan Iban (SNI) 2019 di Kompleks Opis Perintah Nengeri ditu, kemari.

Nangkan nya ku iya, bup nya ukai semina nerang bida ngepan entara bagi menua ba Sarawak tang mega ari selampur dunya mega.

“Nya endang patut nyadi siti sistem kitai ngambika kitai ulih ngetanka ngepan Iban.

“Enti kitai ulih bisi siti bup ti nerang pasal ngepan Iban, dudi hari ila ngepan kitai ulih mansang ke depan sebaka enggau jaku kitai,” ku iya.

Kelimpah ari nya dalam jurai iya kemari, Dr Nelson nerangka kereban ke bisi dikena ba ngepan indu sereta ke lelaki.

“Ngepan Iban baka ke dipeda kitai diatu enda ulih dipadahka kitai Ngepan Moden.

“Kebuah pia laban nitihka reti jaku moden, nya siti pekara baru lalu nadai agi mai pekara lama dalam siti utai nya,” ku iya nerang silik.

Taja pia ku iya, enti ngepan nya mengkang ngetanka chura asal, nya tau dipadah ngepan kontemporari.

“Pia mega lebuh pengawa ngelakuka dagang ngepan, enti ulih anang kelalu ngaga chura baru (improvised) ba ngepan nya laban nya baka ngemodenka ngepan.

“Anang sesekali ngelenyauka chura asal dalam ngepan,” ku iya ngelalau.

Dr Nelson mega ngelalau lebuh bepekit, sida ke enggau pekit nya patut bejimat lebuh bekenaka ngepan baik nya ngepan ke dikena nya ngepan asal, kontemporari (ngerini ke asal) tauka udah digaga baru.

Suara Sarawak