Gaga insuran rumah panjai

KUCHING: Semua rumah panjai lebih agi ba sitak Marudi diperansang ngambi polisi insuran ‘Kampungku’ ti dipejalai Serikat Allianz General Insurance (Malaysia) Berhad.

Direktor Opis Bomba enggau Penyah Penusah (JBPM) Sarawak Khirudin Drahman @ Hussaini madahka insuran nya amat beguna nuju rumah panjai lebuh dituntung penusah angus.

“Pun insuran tu digaga suba endang dikena ngelempungka tating sida ti dituntung penusah bah, tang kitai di Sarawak kelebih agi kandang menua Marudi diperansang ngambi polisi tu ngambika ulih ngelempung tating lebuh dituntung penusah angus.

“Ukai semina ba Marudi aja, kitai endang meransang semua rumah panjai di Sarawak ngambi polisi insuran tu laban premium tu lebih murah ti diatur semina ungkup rumah panjai,” ku iya.

Iya bejaku munyi nya lebuh dirandau pemberita ba Program Nasih Tanah Rumah Sri Pertiwi di Aurora Square Batu Kawa ditu, pagi tadi.

Ku iya, diatu sida chakah madah sereta nerang ngagai sida ba rumah panjai pasal insurans nya ngambika sida mereti pasal guna polisi insuran tu.

“Insurans tu semina beungkus RM10,000 dikena ngelempung tating aja tauka dikena nganti pengerugi nya kebuah mensia mayuh patut diterang enggau nyemetak.

“Mensia mayuh patut ngembuan pemereti atur ngelindung rumah diri empu lalu ukai semina bepanggai ba perintah aja,” ku iya. Berita penuh dalam Suara Sarawak pagila.