Gaga pelin rumah panjai ti likun

KAPIT: Kaban Kunsil Nengeri (Adun) Bukit Goram, Jefferson Jamit Unyat mujur bejadika pengawa ‘Nyungkur Taba ‘ rumah panjai Rumah Richard Nyalau, Genturung Sungai Sepayan, Yong ditu apin lama ke udah.

Jamit madah tiap iku ketuai bilik patur bekerejasama enggau pangan diri awakka pengawa ngaga rumah panjai baru mujur digaga enggau manah.

“Aku temegah ati meda kaul kita ke segulai sejalai ngaga rumah panjai ke baru laban ngaga rumah panjai ke baru sepemanjai 18 buah pintu tu mayuh begunaka jam, belanja enggau orang gawa,”ku iya.

Kelimpah ari nya, Jamit muji peranak rumah panjai tu laban sanggup besaup enggau pangan diri ngemujur pengawa nyentuk teulihka pemujur.

“Maya ngaga rumah panjai tu ila aku arapka kita ngaga pelin ke manah baka ngembuan rumah panjai ti likun enggau ngaga sistem nyeliah diri ari kena penusah angus baka ‘fire breaker’,”

“Lebuh kita besaup, semua pekara ke dikeingin ati deka nyadi nyata nya alai aku arap bendar kita ulih ngetan ke penyerakup ambika enda pechah belah dudi hari ila,” ku Jamit

Maya tu tadi Jamit bisi meri RM300,000.00 geran perintah nengah Projek Transformasyen Menua Pesisir (RTP) dikena ngaduka taba rumah panjai tu enggau manah.

Nangkan ke nya iya mega meri RM10,000.00 ngagai Komiti Pengelikun enggau Pemansang Genturung Pendiau (JKKK) rumah panjai tu dikena peranak rumah tu bejalaika pengawa sida.

Pengawa nyungkur taba tu udah diberekat enggau pengawa besembiang betuaika Father Philip Obaso ari Gerija Katholik.