BETONG: Dua hari agi sebedau ngintu Pengerami Gawai Dayak, mayuh orang madahka diri udah tembu nyendia diri deka begawai.

Tebal agi bala bakih ti ditelefon udah kemisi lalu udah datai ba rumah panjai.

Bisi mega ke benung ba pejalai pulai ngagai menua begulai enggau diri sebilik sereta kaban belayan.

Ku sida, pejalai pulai deka ngintu gawai endang kenang manis … penuh enggau entukar.

Enda sabar deka betemu enggau diri sebilik, kaban belayan enggau bala bakih ti jauh.

Siku staf Opis Pelilih Betong, Christina Peter ngaku Gawai Dayak taun tu besai reti.

“Kati ke enda, taun tu begawai ba Rumah Panjai Engkabang, Nyabor.

“Aku chukup gaga sereta lantang ati laban diberi peluang ulih begempuru sereta ngitu hari besai begulai enggau bala menyadi,” terang iya.

Ku iya, mayuh pengawa nyendia ke diri deka begawai udah tembu taja pen mimit aja laban bisi sekeda utai udah dibeli ari bulan Januari suba.

“Ku orang Sarawak – meli ‘pupuk-pupuk’.

“Aku ngaku taun tu penyikap lebih jelan iya laban rega barang majak mar, enti kuie suah agi dibeli ketegal suntuk jam ngaga kediri empu.

“Ba awak tu, aku meri Selamat Ngintu Pengerami Gawai Dayak ngagai semua kaban, gayu guru gerai nyamai lantang senang nguan menua.

“Enti mabuk tinduk, anang reregap.

Intu meh hari besai kitai enggau ati lantang sereta gaga, anang belaya,” ku iya.

Pia mega staf Opis Pengintu Pengelantang Komuniti, Veronica Jemat ke benung ba pejalai pulai madah, iya tetap besemangat deka begawai di menua taja pen jalai agi jai.

Ku cherita peranak Rumah Panjai Utum Nanga Uyau Lemanak semak Engkilili nya, iya pulai begawai ninting taun.

“Pengerami Gawai Dayak ba rumah panjai amat richah.

“Nya kebuah, taja pen pejalai pulai agi nengah jalai bebatu, nya enda nyadi penanggul,” ku iya seraya madahka pejalai begunaka timpuh sejam 30 minit enti gaya mua hari manah lalu tiga jam enti ujan.

Taun tu iya pulai enggau bakih semak iya ari Kapit, Iton Roseta ngaku pengawa nyikap diri ngintu Gawai Dayak udah tembu.

“Baka orang bukai ke kena empas ari rega barang, aku mega pia lalu nya meh kebuah aku bebelika barang mimit aja.

“Taja pen semua barang beguna dibeli, tang jelan aja.

“Aku deka meri Selamat Hari Gawai Dayak.

Bejimat meh mansut ke belanja laban lebih beguna agi, iya ulih diintu enggau bala diri sebilik ti dikesayau.

“Anang enda nyaga adat ngintu Gawai Dayak.

Nuju sida ke agi dalam pejalai, bejimat meh ba jalai alun.

Anang mai entukar enti mabuk,” ku iya agi.

Siku agi bakih ari Opis Penerang, Beatrice Abchak Akir bekunsi penyikap diri ngaku taun tu endang Gawai Dayak chukup ngerindu ke ati.

“Aku begawai ba Rumah Panjai Ulu Teru semak Debak, rumah panjai laki aku.

“Pulai endang penuh enggau entukar laban taun tu pemadu enda sabar, mayuh kaban belayan sepiak laki ke lama enda pulai deka pulai begawai.

“Lebih manis, nembiak mit mega mayuh (anak petunggal laki).

Ngelama tu anak aku aja bisi maya Gawai Dayak,” ku iya.

Ketegal gaya hari ti angat, ku iya, bilik udah dipasang enggau air-con ungkup pengelantang diri sebilik enggau bala pengabang.

Beatrice madahka diri betuah laban laki iya bisi nulung nembu ke kuie lapis Lumut Cheese, kuie Belachan enggau Lapis Bumi.

Iya mega meri Selamat Ngintu Pengerami Gawai ngagai sida sebilik enggau kaban belayan ba Geligau Ulu, Engkilili.