Udah lebih dua taun menua kitai ditanggul ulih kereka penyakit Covid-19.

Nya meh ti ngujungka semua pengawa begulu, semua pengerami nyengkaum Gawai Dayak nadai diintu enggau pengeragak baka selama.

Ukai nya aja, mayuh endang nadai ngintu pengerami Gawai enggau begulu rami bukai.

Nya alai laban taun 2022 menua kitai udah balat nenduka atur SOP, bala mensia mayuh tetap gagit bendar deka begulu baru ngintu Gawai Dayak.

Bala mensia mayuh, kelebih agi kitai Iban ke agi bisi pendiau rumah panjai endang dipelaba deka mulaika diri ngundang menua asal laban lama udah lelengauka diri sebilik.

Mayuh bala lama nadai betemu enggau pangan diri laban menua balat tebunsa ketegal pengerekai penyakit koronavirus nya.

Sehari dua semak Gawai, semua jalai darat, jalai ai tetap deka sekut laban mayuh perau ekspres enggau entuka.

Ba Batang Rajang, tajapan udah bisi jalai darat nyambung Kapit enggau endur bukai, endang dipelaba agi mayuh mensia nepan muto ekspres pulai ke ulu ngagai Song, ngagai Kapit, ngagai Belaga.

Dia kitai deka meda penyangkai moto ekspres di Sibu, di Kanowit, Song enggau Kapit endang dedat penuh laban mensia mayuh ti deka nepan nyadi pesinjir.

Endang tebal agi bala kitai Iban ari mengeri dipelaba ngena awak Gawai tu mulaika diri ngagai bilik penaik diri empu ba rumah panjai.

Tu meh maya kitai bela ngayanka rumah panjai meruan nyadi endur ti diangkun sereta dikerinduka semua.

Tegal nya meh rumah panjai tetap beguna, tetap nyadi palan tebilang ungkup semua kitai Iban.

Kitai deka meruan taluk, meruan ngundang, ngabas, ngintu sereta nyaga pemanah, pemeresi enggau pengelikun palan kitai, pendiau betampung kitai.

Beserimbai enggau Gawai, bala kitai ba rumah panjai endang bela nganti malam Mantar Gawai, iya pun lemai tu legi 31 haribulan Mei.

Bala kami serumah di Kedap, Saratok semampai chukup rami berengkah ari pun lemai malam Mantar Gawai.

Tu berengkah ari pengawa makai lemai ba ruai diri empu. Bala orang sebilik nya deka sama begulu ba ruai diri empu nganti maya jam berengkah makai.

Endang bisi siti mija besai ditagaka alai ngengkah utai dempa enggau ai irup. Bala mayuh semampai nyenguk ruai sereta ensepi pemakai pangan diri.

Udah makai lemai ba ruai diri empu, nya baru bisi ga bejalai ngulu ngagai ruai pangan diri ngirup mimit kena nganti gulu bala mayuh ba ruai tuai rumah urung jam pukul 11 malam kena nganti jam pukul 12 malam tu.

Lebuh jam mangkung pukul 12 malam, bala ti bisi senapang lalu pansut ke luar rumah nimbakka senapang. Bisi mega sekeda lalu bemain merechun ba luar rumah laban sigi ditagang bemain merechun ba dalam rumah.

Ba taun 2018 suba, pengerami Gawai Dayak tak diserimbai enggau pengerami melah pinang uchu penulis empu iya nya Clarissa Jabai @ Wen disabung jadi enggau Felix asal ari Sungai Engkabang, Roban. Nyadi chukup rami meh pengawa melah pinang nya.

Kira seminggu lepas Gawai bala di Kedap mega semampai ngatur pengerami ngiling tikai tauka bidai ba jaku bala sekeda.

Atur tu dikereja bala Iban enggau sekeda pupu raban bansa Dayak bukai kemaya tu tajapan terubah iya baru berengkah ngintu Gawai Dayak dalam taun 1964 menya enggau taun-taun udah nya endang apin bisi pengerami ngiling tikai.

Enti nunda iya, pengerami tu patut dipejalaika dalam bulan Enam tang taja pia, suah bendar dalam dua tiga taun ke udah, kitai sama bisi ninga pengerami ngiling tikai tu agi bisi diatur dalam bulan Lapan enggau Semilan.

Tang nadai meh ngawa, laban reti iya kitai Dayak agi mengkang gagit deka begawai taja pan udah lepas dua tiga bulan Gawai Dayak udah nyadi.

Nyadi reti ngiling tikai nya, orang ke begawai tembu begawai laban tikai ti dianchau kena begawai nyau udah digiling, lalu nadai agi alai duduk.

Ba adat bansa Iban, sebedau begawai enda tau enda nganchau tikai dulu. Nitih adat asal bansa Iban endang bisi terantang tawak kena ngerah semua bala diri serumah nya awakka sama sereta ngilih tikai.

Lalu enti tikai udah dianchau, orang empu rumah enggau semua pintu bilik dalam rumah nya udah sedia deka nerima penatai pengabang.

Dalam adat basa bansa Iban, pengabang mesti dianti ngena tikai ti beresi, nadai uras awakka sida lantang duduk ba tikai nya.

Lalu enti tikai udah digiling baru, reti iya gawai udah tembu lalu pengabang pan endang udah nadai agi dia.

Dalam taun tu, pengerami ngiling tikai ba rumah panjai kami di Kedap munyi ti deka diatur ba tengan bulan Enam tu lalu disadang deka digulu sekeda pengabang ari rumah bukai, nitih padah Tuai Rumah Robert Lin Malina lebuh bejaku ba talipaun enggau penulis. Pengawa tu udah diketu berapa taun ti udah tegal Kubit.

Dalam taun 2017 suba, rumah panjai kami di Kedap chukup rami ngintu pengawa ngiling tikai. Kebuah pia, laban bisi dua tiga puluh iku bala pengabang ari rumah bukai ke ngulu pengerami kami serumah.

Nyadi pengerami nya sigi udah belabuh dipejalaika ari pagi hari ngintu gawai ngiling tikai nya.

Atur program nya nyengkaum batak tali, main bintin ungkup indu enggau lelaki, pekit nyumpit ka bala anak mit enggau besai tuai sereta mega enggau pekit belaban pemesai betis ungkup bala indai orang.

Tu siti pekit ti balat ngasuh orang geli ati ketawa laban bisi bala sekeda baru meda pemesai betis bala bini pangan diri.

“Pedis perut ketawa meda ulah sida ke bepekit pemesai betis,” ku TR Robert Lin ke madahka bini iya enda enggau laban nemu betis diri numbas pemesai.

Malam ngiling tikai taun nya mega bisi bejalaika atur pekit fancy dress. Nyadi tu ungkup bala indai enggau ini orang aja.

Bala sida ke ini orang nyau bakachirak pemirah insu mulut sida sereta digerinek enggau chuk bulu bansu. Asai ke meda sida Sophia Loren, Elizabeth Taylor enggau Bridgette Bardot maya sida nya benung top kelia. Sigi bajik indu Iban enti udah nganta.

Bisi bala laki sida nyau abis enda ngelala bini diri; pia mega bala uchu sida bisi enda ngelala ini diri empu agi laban udah jauh bebali tegal ngena makeup.

Akai rai amat bisi ngasuh ketawa ga laban uchu siku ari sida ini orang nya nyau rauh-rauh nyabak laban enda nemu tunga ini diri. Ini iya nya endang bisi dia tang udah transformed laban udah dipasang makeup enggau buok wig ulih nginjau ari sida ke dara.

Munyi ku lagu kaban aku siku penanyi Iban agi biak Leez Zwita, amat tau dikumbai ‘bajik tuai’. Ku iya: “Jaga bala kita aya, diatu bala sida ibu udah ka nganta.”

Kelimpah nya, bisi mega atur pekit karaoke ungkup bala sida ke biak enggau tengan umur, indu enggau lelaki. Semua pekit endang bisi perais ti manah magang, laban endang bisi orang spunsa.

Kelimpah ari kena nutup rami Gawai Dayak, atur ngiling tikai tu mega awak ti manah kena bala diri serumah, diri sebilik enggau diri sekaban sama berami negika pengering tali kaul enggau pangan diri, sama segulai sejalai ngemansangka diri.