KAPIT: Siku peranak Rumah Panjai Niga Sungai Nyiro Tinjar, Baram, Galong Luang, 51, dipadu nyadi Residen Bagi Menua Kapit berengkah ari 1 Disember, kemari.
Galong mangku pengawa nya nyilih penuduk ex-Residen Bagi Menua Kapit, Nyurak Keti ti belidar gawa ngagai Opis Residen Bagi Menua Bintulu.
Ku iya, sebedau tu, iya kala gawa nyadi Sapit Residen Bagi Menua Kapit berengkah ari taun 2016.
“Opis Residen Bagi Menua Kapit tu stesyen ketujuh endur aku gawa lalu palan keterubah endur aku ngepunka pengawa nyadi Pegawai Opis Sarawak iya nya ba Limbang ba taun 1998.
“Maya tu suba, peneleba gawa nyadi pengajar enggau pemansik berubat dikena aku ngepunka pengawa nyadi Pegawai Opis Sarawak,” ku iya.
Galong mansutka pekara nya lebuh bejaku ba Program Nyerah Pangku Pengawa ti diatur ba Kompleks Opis Perintah Nengeri Bagi Menua Kapit ba Bleteh kemari.
Ari nya, isya ngarapka semua pegawai ba Opis Residen Bagi Menua Kapit ulih neruska kerejasama enggau pengeransing sida baka sebedau tu.
