Gambar Clovis megai buah getah, bubu enggau ngema selabit narit ati mensia mayuh

KUCHING: Clovis Reyner menang ba Pekit Ngepan Dayak Kategori Nembiak diatur Page Iban Troll Official datai ari sukung semua.

Indai Clovis, Jane Julius Nanta asal ari Limbang madahka pemujur anak iya beumur dua taun lima bulan nya endang ari penyiru mensia mayuh.

“Enggau baruh ati, aku meri besai terima kasih ke sukung bala ibu, aya, ini enggau aki Clovis sereta bala bukai ke udah mayuh ‘like’ enggau ‘share’ gambar iya.

“Nadai ulih dibalas kami sebilik ke penyiru enggau pemanah budi kita, semina Petara aja ulih malas semua nya.

“Sekali agi meri besai terima kasih ngagai kita ti rindu meda gambar anak aku, Clovis ke benung megai buah getah, bubu sereta ngema selabit,” ku iya mandangka pengaga ati diri.

Kelimpah ari nya, Jane meri besai terima kasih ngagai Page Iban Troll Official enggau bala pemelanja pekit nengah online nya lalu nyadi pekit dikerindu mensia mayuh nyerumba Gawai Dayak 2021.

Jane, 35 taun, gaga amat ati pengudah anak iya bulih gelar champion ba Pekit Ngepan Dayak Nembiak Kategori setaun ngagai 11 taun.

MANDANGKA BUDAYA

KENANG… Entara gambar kenang Clovis enggau sida sebilik.

Jane madah, pekit online tu endang patut diatur kelebih agi maya pandemik Covid-19 baka pekit diatur Page Iban Troll Official tu ngambi bisi dipandang ngagai mensia mayuh kelebih agi bansa bukai ke apin ngelala budaya bansa Iban.

Iya madahka pekit online tu chukup manah kelebih agi diatu semua orang bisi media rama Facebook, nadai ngira biak tauka tuai endang ditemu kitai bisi telefon binching enggau akaun Facebook kediri empu.

“Tu mih peluang kitai mantaika ngepan dikembuan diri ngambi dibantai nengah pekit online ngambi semua rindu ati nyukung kelai angkunka budaya bansa diri empu.

“Pia mega, pekit online tu meri peluang ngagai bansa kitai mantaika genap ngepan dikembuan ba tiap menua.

“Program baka tu ukai semina mandangka pengaya budaya enggau main asal dikembuan kitai tang meri peluang ngagai rebak baru ngambi ulih belajar tauka lebih ngelala perengka ngepan ti dibantai nengah online nya,” ku iya nerang baru.

Ngelansa silik, Jane madah enti baka taun ke udah, pekit kumang baka tu suah diatur kelebih agi maya pengerami makai lemai enggau Pengerami Mantar Gawai.

Tang ku iya pekit tu enda ulih diatur baka selama ketegal pengerekai pandemik Covid-19 ngujungka raban pengatur pekit tu berundingka chara bukai nentuka pekit nya diatur ninting taun.

Nya alai ku Jane, pekit online tu dikena ngerami sereta merindang mensia mayuh ke enda ulih pulai ke menua baka sida sebilik ngambi semampai bisi asai ngintu pengerami Gawai taja jauh ari menua diri.

NGETANKA BUDAYA KITAI

KELING KAMI… Gambar Clovis ngujungka iya nerima mayuh ‘like’ enggau dikerindu mensia mayuh. Gambar ari Lan@Photograper.

Lebuh nerang kati iya teulihka runding nganjung anak bujang iya bepekit, Jane madah iya nganjung Clovis bepekit online lebuh tepedaka penerang ba siti page madahka barang sapa follower pages nya ke deka enggau bepekit tau nganjung gambar ngena ngepan.

“Dia aku meda mayuh gambar anak mit udah dibantai ba pages nya, aku lalu berunding deka nguji nganjung gambar Clovis ngena ngepan laban endang udah bisi gambar iya.

“Pengudah aku nganjung gambar nengah Whatsapp nitihka lumur telefon ke dipadah dalam pages nya tang terubah suba nadai timbal ari sida.

“Peda ku belama ba pages nya nadai ga gambar tudah anak dipansut dia, engka ukai jereki iya ga ku runding aku.

“Hari siti, aku tepedaka pages Iban Troll Official bisi ngatur Pekit Ngepan Dayak Anak mit, aku pen nganjung gambar anak laban deka enggau orang ngeruh ai maya Gawai tu.

“Nya kebuah, aku nganjung aja gambar Clovis laban rindu deka nganjung anak bepekit ngepan nya tang nasip amat iya mujur masuk pekit laban nyau ka abis timpuh,” ku Jane nerang.

Berebak enggau nya, Jane madahka pekit tu sebagi ari chara kitai dikena ngetan sereta ngangkatka budaya asal kitai Iban laban nya pesaka kitai.

Terang iya, pesaka kitai tu patut ditan ngambi ulih ditampung ngagai rebak dudi.

Kelimpah ari nya ku Jane, semua kitai ngembuan tanggung pengawa ngetanka adat enggau budaya ngambi enda lesap ngapa diserunyut arus pemansang dunya.

Ungkup penerang semua, Clovis Reyner mujur bulih 20,000 ‘like’ sereta bulih gelar champion sereta mai pulai mata duit RM300 dientudi Xyril Xaccary Werry nerima 16,000 ‘like’ enggau mai pulai mata duit RM200 sereta Muhammad Zubair Khan nerima 11,000 ‘like’enggau bulih mata duit RM100.

Suara Sarawak