Garam bukit mayuh guna

MIRI: Garam bukit ngembuan guna ti chukup mayuh kelebih agi ungkup pengerai tubuh.

Pakar Terapi Spa ti mega ngarika Heartini Beauty Spa Noorizan Juji madahka sida mayuh ngena garam bukit ba spa sida nyengkaum ba produk sabun mandi, skrub tubuh, sabun mua, herba diirup sereta ke bukai.

“Spa kami endang udah lama ngena garam bukit dalam semua terapi ti digaga ditu.

“Lalu semua stok garam bukit tu diambi sereta diproses kami ari Ba’ Kelalan, Lawas sebedau dianjung ke Miri,” ku iya.

Lebuh dirandau pemberita Suara Sarawak ba pengerami Bejual ari Ladang (JTDL) & Industri Asas Tani, Noorizan madahka produk tu udah lama dikena sida ba spa.

NGELAKU PRODUK…Norrisazan Juji (Pakar Trapi SPA/ kiba) begulai enggau pemantu iya ngelakuka produk beserimbai enggau Program Jual Terus ari ladang diatur Fama di Bintang Mall, Miri kemari.

“Taja pia, baru lima tahun produk tu dijual ba makit laban mayuh peminta ari bala penguna kami.

“Sida udah nguji produk tu ba spa, lalu sida ngasuh kami nyual tu ukai semina ba spa, tang mega ari makit,” ku iya.

Beduduk ari nya, produk tu majak ngerembai ari taun ke taun, ku iya nambah.

Ku Noorizan madah, sida mansutka mayuh bengkah produk ke pengerai dalam tubuh tauka luar sereta pemajik diri ari garam bukit.

“Entara iya baka sabun mua, sabun tubuh, serum mua, tonik tauka herba ke pengerai dalam tubuh sereta ke bukai.

“Taja pia, garam bukit tu ukai semina nyadi kereban besai tang mega nyadi kereban tambah dalam produk spa kami,” ku iya.

Sepengelama tiga hari pengerami JTDL & Industri Asas Tani diatur di Bintang Megamall ditu, produk baka sabun mua enggau skrub ari garam pemadu mayuh dibeli mensia mayuh.

“Tengah hari tu (kemari) kami mengkang nganti stok ari spa datai dianjung kitu,” ku iya seraya nunjukka penyampau barang ke agi bisi dijual ba palan bedaja.

Nitihka penerang, Heartini Beauty Spa mujur ngiga kaban dalam dagang (business-matching) ba pengerami JTDL.

“Kami bisi dirandau pengari ari siti palan bebelika barang tebilang ditu bekaul enggau produk spa kami.

“Lalu semua randau bekaul enggau pekara ke bukai deka diteruska nitihka guna spa kami enggau piak sida,” ku iya.