Gawa bebendar, enggai ngelebu rayat

KUCHING: Pemesai pengandal dilempai ba tandan bau kitai kelai orang pechayaka penau kitai ngereja pengawa.

Ku Norina Umoi Utot, lebuh nemu diri dipadu gawa nyadi siku ari Kordinator Parlimen, iya sedarka tu pengarap bala ketuai Perintah Pakatan Harapan (PH) ngagai sida.

“Genap pangku pengawa diberi datai ari pengandal orang ke kitai ulih ngatur pengawa sereta ngerembaika polisi perintah ngagai renggat baruh.

“Kebuah pia laban kitai tau dikumbai ngarika perintah mai pemansang enggau nentuka rayat bela ampit ngasaika pengelantang ari pemansang ke dibai,” ku iya.

Norina mansutka jaku nya pengudah nerima Surat Chiri Kordinator Parlimen ba Pengawa Nyuaka Surat Chiri Kordinator Parlimen Nengeri Sarawak diatur ba sebuah hotel tebilang ditu, kemari.

Pengawa sehari nya udah dipenyadi Chairman Kaunsil Pengatur Pemansang Nengeri (MTPNg) Perintah Besai ke mega Menteri Kereja Raya Malaysia, Baru Bian.

Ku iya, Kordinator Parlimen tu dianjung gawa ngagai sitak parlimen ti ukai diarika Kaban Parlimen ari PH di Sarawak ke alai sida betubuh 19 iku ke udah dipilih.

“Kitai deka nentuka rayat Sarawak enda tinggal ari sukut pemansang kelebih agi projek ti udah diungkupka Perintah Sarawak enggau Perintah Besai.

“Agih Belanja Khas penyampau RM500,000 tauka setengah juta setaun diberi ngagai genap Kordinator Parlimen ungkup ngemansangka sitak menua dipegai diri empu berindik ari sitak tu diarika penyakal ba renggat Parlimen.

“RM100,000 diagihka ngagai opis enggau sekeda staf lalu laluh RM400,000 ungkup geran pemansang rumah panjai, genturung pendiau, rumah sembiang sereta melanja projek mit ke bukai.

“Lalu semua tu begunaka keretas kereja enggau nitihka atur pengawa udah ditetap ti dipatau ICU JPM di Opis Menteri Besai.

“Reti iya, setiap sen ke dipelanja kitai deka dipatau enggau dirikod ngambika semua pengawa, projek, program enggau aktiviti dipejalai ngena agih belanja nya terang dipeda.

“Semua tu mandangka penau, pemintar enggau penyikar kitai ngereja pengawa ti udah dilempai lalu kitai naka ulih enggai ngelebu orang ti udah andalka kitai gawa,” ku Norina madah nyemetak.

Suara Sarawak