Gawa manah ungkup menang perang PRN12

KUCHING: “Aku deka ngaga enggau pemadu manah ngetanka penuduk ba Batu Kitang,” ku Adun Batu Kitang Lo Khere Chiang lebuh ditanya pemberita kemari.
Iya madahka ukai semina Dun Batu Kitang aja, Gempung Parti Sarawak patut ngetanka sitak ke bukai.
“Anang meda ngagai siti palan aja, laban menang ba siti palan ukai mai reti kitai ulih menang perang.
“Kitai ngembuan siku Kepala Menteri ti pintar, nya alai kitai enggai nyadi baka sida di Semenanjung Malaysia ti majak belaya pasal sapa nyadi Menteri Besai,” ku iya.
Kelimpah ari nya, iya andalka semua raban GPS deka ngembuan pengeransing ati ngaga pemadu manah sebaka enggau iya ngetanka penuduk diri empu.
“Ti kitai begempung, Kepala Menteri (Datuk Patinggi Abang Johari Tun Openg) ulih kering ngulihka hak menua kitai pulai baru ba renggat Perintah Besai.
“Nya kebuah, kitai mesti begempung napi Pengawa Bepilih Besai Nengeri (PRN) ti deka datai,” ku iya.
Tandu iya, taja peluang menang ba Batu Kitang bedau ditemu agi iya andal deka neruska pemansang di genturung nya.
“Nya tanggungpengawa aku ngagai rayat laban sida udah meri mandat ngagai aku ba PRN ti lalu.
“Aku deka ngaga manah agi ninting hari ngemansangka sitak tu.
“Kebuah aku ulih ngaga kereja enggau manah laban Sarawak majak bisi penatai pemisi iya nya enti aku begunaka belanja ngatur pemansang ditu aku deka minta belanja ngagai Abang Johari,” ku iya.
Iya sekali agi andalka GPS deka menang PRN ti deka datai.
Lebuh ditanya sentang Parti Sarawak Bersatu (PSB) ti madahka diri ulih menang dalam PRN 12 tu, lalu megai perintah nengeri, Khere Chiang madahka penemu nya ulih dibantaika semua orang.
“Semua raban politik deka madahka diri ulih menang, nya peragam ati sida, nadai salah,” ku iya.
Ungkup penerang ba PRN11 kena taun 2016, Khere Ching menang enggau majoriti 1,840 undi ngelaban Abdul Aziz Isa ari DAP di Dun Batu Kitang.