Gawai 2020: Tuah berumah panjai baru

ATUR Tagang Pejalai Besyarat (PKPB) dilanjar nyentuk 6 June enda ngasuh pengagit ngintu Gawai Dayak ba rumah panjai baru tendur.

Louis Kelaman madah, macham pengawa udah dikereja sida serumah nyendiaka diri ngerami Gawai Dayak baka ngatur pengawa beripai ngupas kandang ngelingi rumah, ngukir enggau ngechat dinding ruai enggau bilik besai nyengkaum kaki lima.

Pengagit ati ngintu Gawai enda ulih kira taja taun tu hari besai nya diintu ngena chara bebida nyengkaum SOP ti udah ditetap.

Taja pia ku Louis, ati tetap sinu ngenang apai indai jauh di menua sereta enda ngintu Gawai begulai baka taun ke udah-udah.

JEREKI DIBERI PETARA

NYINUK… Louis benung ngukir dinding rumah panjai baru sida ba Kampung Sirih, Segedop, Jalai Batu Kawa ditu.

Iya madah, peluang dibai ngentak rumah panjai baru ba Kampung Sirih, Segedop, Jalai Batu Kawa ditu, siti ari jereki enggau tuah besai sida sebilik taun 2020 tu.

Ku iya, sida ngentak kena 28 Januari tu tadi asil ari aum enggau penemu bala ke sama setuju pindah kia lalu berumah dia sereta betuaika Chamberlin Sering.

“Kami pindah kitu bisi 21 pintu bilik tang semina tujuh pintu aja kami ke betampung perabung nirika rumah panjai nitihka penemu bala mayuh.

“Sida ke bukai ngentak rumah nyembuah, berimbai ditu mega laban udah selubang penemu deka segulai sejalai kenyau ari suba.

“Tambah mega kami sebuat endang bela angkat ari endur ke sama, genturung pendiau setinggan ba Desa Wira Lorong 1, sebedau berumah panjai ditu,” ku iya lebuh dirandau Suara Sarawak.

LANDIK DI TUNJUK JARI… Pengelandik Louis meri peransang ngagai bala nembiak bukai ngelagu ruai diri ngena ukir Iban.

LANDIK NERO

Louis madah, ketegal nadai nemu nama bagi pengawa deka dikereja sekumbang diau jenuh di rumah berindik ari Atur Tagang Pejalai (PKP), iya teulihka runding ngukir dinding rumah panjai sida.

“Pemuas ke duduk ba ruai lebuh ngaga produk pengelandik jari bukai baka sugu tinggi enggau nyanggitka dunjung manik, dia aku berunding, manah endar enti dinding rumah tu diukir tauka didero ngena ukir kitai bansa Dayak.

“Aku ngepunka pengawa nero ba bilik diri empu. Ukai madah diri landik nero tang kebendar bai ati rindu meda ukir asal kitai Dayak Iban,” terang iya.

Taja pia, pengawa ngukir tu kebendar enda tau dikereja sebarang enti orang nya enda chukup tuai bulu sereta enda digagaka utai empa laban nemu nganu tauka dikumbai kitai tau alah ayu.

“Ambika chunto, ukir asal Dayak Iban baka ukir nabau enggau likau pantang, entara ukir ti enda tau digaga sebarang.

“Kebuah pia laban kitai enda nemum penuai bulu siku-siku kelimpah nangika tau pulaika penusah ngagai tubuh orang nya empu.

“Nya alai aku empu dulu ngepunka ukir nya baru sida ke bukai tau berengkah ngelinsu tauka nampung pengawa ke patut laban kitai nangika sida teulihka penusah.

“Ukai reti kitai ngajihka rangkang ngachuk mata, tang bela bejaga mega sereta nitihka penti pemali sida ke tuai ti udah dulu makai garam,” ku Louis madah silik.

SEATI BEGULAI

Sekumbang nyau deka semak Gawai Dayak tu tadi, kami serumah bisi baum lalu udah ngatur pengawa beripai ngupas enggau meresi kandang ngelingi rumah kena 11 Mei nyin tadi.

Bala mayuh nadai mayuh jaku enti disebutka pengawa bebala mayuh ungkup pengelantang enggau pemayuh begulai kelebih agi sida ke tuai ti ngembing bala nembiak ngatur pengawa.

Kami serumah mega ngelimpangka awak diri beduruk nyemin endur paking kerita enggau laman besai rumah panjai.

“Rindu amat gawa bebala mayuh baka tu. Pengawa berat tau nyadi lempung, lalu ulih dirumban tembu sehari nya. Jam mega nadai mayuh tebasau.

“Baka selama, sida ke indu bebela nyendiaka pemakai enggau ai irup kena kami ke lelaki ke gawa ba tanah. Nya kebuah aku madah, rindu mega pengeransing bala kami ke sama ngentak ditu,” ku iya madahka pengaga diri.

LELENGGAU KE MENUA

MANDING… Awak meda tv ba ruai seraya nimpai pemanah ukir diturai jari Louis empu .

Hari besai kitai Dayak taun tu mega jauh bebida ari taun ke udah. Enti baka selama, sida Louis deka pulai ke menua di Kanowit laban apai indai diau din.

“Taun tu kami sebilik ngintu ba ditu aja lalu apai indai enda ulih kitu enggau berami ba rumah panjai baru. Sinu mega asai ati ngenang sida jauh di menua.

“Tang nadai ku enggau laban meretika PKP ti nagang kitai mindah sepeneka ati entara pelilih menua, nangika kitai dirampit igi penyakit Covid-19.

“Ka tauka enggai, begawai ditu aja taun tu, taun bukai ga kitai pulai ke menua ngintu enggau diri sebilik. Gawai taun tu kira ngintu enggau bala diri empu ke rumah berimbai ditu.

“Taun tu mega aku nagang orang bukai niki ke rumah panjai laban kami serumah nadai nerima pengabang ari menua bukai nitihka atur tauka SOP udah ditetapka perintah.

“Kitai bela nemu menua benung sigau ketegal pengerekai igi penyakit Covid-19 ti tau ngerampit sebarang orang lalu udah nabanka bepuluh ribu nyawa serata dunya,” ku iya nerang.

GAWAI CHARA BARU

Gawai taun 2020 mai seribu reti ngagai semua kitai kelebih agi ba kaul, nyaga takah, pekara pemeresi enggau pengelikun kelimpah ngasika atur dikena kitai nyeliahka diri ari penusah.

Nya alai, kandang diatu kelebih agi maya ngintu Gawai, manah kitai diau ba rumah, beserumpu makai enggau diri sebilik negapka pemanah kaul kitai begulai.

“Nuju sida ke ngemeran pengawa dagang nadai ngira bansa utai dijual, kena peluang bedagang chara online enggau ngena manah bantu diberi perintah nentuka kitai enda putus belanja.

“Jaku lalau ari aku, semampai nyaga pemeresi diri, sida ke diau serumah sereta orang ke beserimbai pendiau enggau kitai. Kurangka pengawa begelumu lalu kirum mih berita ngagai sida ke jauh di menua.

“Baka aku, gawai taun tu berasai sinu laban enda ulih begawai enggau apai indai di menua,” ku iya nyimpul randau.