Gawai Dayak 2020 ngundang ati sinu

Ngelama tu nama udah bulan Mei tentu kitai mupuk berasai gaga laban berundingka pengerami Gawai Dayak. Maya tu mega peluang kitai pulai kemisi panjai begulai enggau apai indai, diri menyadi sereta kaban belayan di menua laban ti udah lama kiruh gawa di mengeri.

Tang Gawai Dayak 2020 dipelaba berubah sereta ngundang asai sinu ba lubuk ati laban tebal agi raban Dayak ke gawa tauka diau mengeri ditagang pulai ke menua asal ketegal pengerekai igi penyakit Covid-19 sereta Atur Tagang Pejalai Besyarat (PKPB) ti agi meruan dipejalaika di menua tu.

Atur nagang peranak rumah panjai pulai ke menua tu ukai semina ditesau ungkup Dayak ke diau di Sarawak aja tang mega nyengkaum sida ke gawa ba luar Sarawak.

Buah penemu tu udah dibantaika Presiden Gerempung Bansa Dayak Sarawak (SDNU) Tan Sri William Mawan Ikom apin lama ke udah ti ngelalau sida ke gawa ba luar Sarawak patut nginsil perambu diri ti deka mulaika diri kemisi Gawai taun tu.

Kenu ku iya, penemu tu dipansut laban nyukung penerang ke udah dibantai Gerempung Perubat Malaysia (MMA) ti minta sebarang perambu pulai ke menua nyerumba pengerami patut dikinsil dikena nyeliahka pengerekai penyakit Covid-19.

Pekara tu mega disukung Komiti Penyangga Penusah Ngenyit Nengeri (JPBN) bela enda ngemendarka sida ke diau ba luar Sarawak pulai ke menua nyerumba pengerami Gawai Dayak.

Nitihku penerang Mawan, tu ukai ketegal ngira Gawai Dayak aja tang berundingka pengelikun diri enggau pengayu orang ke disayau kitai (apai indai).

Pia mega, Chairman JPBN ke mega Sapit Kepala Menteri Datuk Amar Douglas Uggah Embas mega udah mansutka gerah pengerami Gawai Dayak taun tu deka dirami sehari aja.

Berebak enggau nya, Uggah bisi ngerintaika Atur Operasyen Standard (SOP) ke patut dititih rambua ngintu Gawai Dayak taun tu iya nya ditatak enda ngelui 20 iku sekali begempuru. Kelimpah ari nya, rayat di nengeri tu mega enda dikemendar nerima penatai bala pengabang baka selama.

Sebedau tu mega, kitai bela nemu sebedau Gawai Dayak nyadi tentu bisi pengerami Mantar Gawai. Pia mega udah Gawai Dayak diatur mega Ngiling Bidai. Taun tu, kitai enda ulih ngintu mantar Gawai enggau Ngiling Bidai seagi penyakit tu bedau ditukuka punas.

Menteri Penyaga Pengelikun, Datuk Seri Ismail Sabri Yaakob mega udah mansutka penerang pasal pengerami Gawai semina ulih diatur sehari aja nyengkaum Hari Raya Aidilfitri.

SOP ke meseti dititih maya ngabang iya nya enda tau enda ngena sengkabung mua, mai penuchi jari (pemunuh kuman) enggau basu jari enggau sabun sebedau ngusung rumah orang.

Kelimpah ari nya, pejalai entara pelilih menua mega meseti minta permit ari balai polis. Pekara tu tentu ngundang penyelai ari selama, taja pia ke pemaik tauka nentuka pengelikun semua orang ke ngelinggi kitai meseti nitih atur ke udah dipadah piak bekuasa.

Nya kebuah, beduduk ari lalau ti munyi nya dikearapka mensia mayuh meretika gerah ke udah dipadah lebih agi barang sapa ke diau ba zon merah. Sida tu patut bejimat lebuh pulai ke zon gadung laban penyakit Covid-19 disempama baka munsuh ti enda dipeda, nyerang sebarang orang ba sebarang endur sereta enda ngira jam.

Suara Sarawak