Gawai di Bakong Ai meri kenang manis tim Projek Pensel

SRI AMAN: Gawai Dayak taun tu ngemai kenang manis ngagai tim Projek Pensel ti diketuaika Norina Umoi Utot.

Ku Norina, kenang pengawa sida sebuat sekalika tu mega deka nyadika pengingat dudi hari kelimpah ulih nempa pemanah kaul begulai enggau rayat renggat baruh.

“Nerima kangau ngintu malam Gawai, 31 Mei, ba Rumah Augustine Bunto, Bakong Ai, Sri Aman ngemai reti chukup besai ngagai aku empu laban tu basa kitai ngaul pangan diri.

“Kitai bansa endang dikelala enggau pemanah basa lebuh ngelalu penatai bala temuai enggau pengabang lalu ulah baka tu patut diterenak enggau ditampung rebak baru,” ku Norina temegah.

Nya kebuah ku Norina, iya naka ulih nangkup genap kangau ngabang ari bala ketuai raban bansa nadai ngira bida penemu politik, bansa enggau pengarap laban meretika pemesai reti kaul serakup pupu bansa.

NGELALU PENGABANG… Tabuh ngading ajat dikena ngelalu penatai tim Projek Pensel diuluka Norina lebuh malam Gawai di Rumah Augustine Bunto, Bakong Ai, Sri Aman.

Taja pengawa projek pensel ti ditibak ari penemu iya baka beratka sida ti diau di menua pesisir kelebih agi menua dipegai Sri Aman, tang besai juluk Norina deka ngerembaika pejalai projek tu ngagai menua bukai.

“Aku udah merambu ngatur program ti sama di Sungai Apong di Kuching dalam bulan Julai taun tu lalu ngarapka perambu kami sebuat mujur sereta nyadi nyata.

“Pemujur pejalai tim Projek Pensel ngelama tu mega asil ari sukung, saup enggau kerejasama ari semua ti nadai kala leju nyukung enggau nyaup sereta meri kerejasama ba genap pejalai pengawa kami sebuat.

“Pia mega bala tim aku empu ti nadai kala mantul ati ngereja pengawa ti udah dilempai ba sida ngelama tu, ngasuh aku ransing agi nampung pengawa diri gawaka bansa; ngaul bala nembiak ari renggat tumu sereta sida ti lunggar umur,” ku Norina madah nyemetak.

Kebuah pia ku iya, laban rebak biak tu endang patut diseridi enggau diembing nyadi mensia menyana sereta deka nampung pengawa nyadi ketuai menua jemah.

NGELALU PENGABANG… Tabuh ngading ajat dikena ngelalu penatai tim Projek Pensel diuluka Norina lebuh malam Gawai di Rumah Augustine Bunto, Bakong Ai, Sri Aman.

“Projek Pensel mega enda ngelaungka jasa sida ti lunggar umur ari pengawa nyendiaka kelas ungkup sida ti diatur dua ngagai tiga kali seminggu, dipungkal di Kampung Sepan, Balai Ringin enggau Kampung Melikin di Sungai Gundom,” terang iya.

Norina mega nyemetak madahka batang tuju Projek Pensel endang nadai kala limpang ari tuju asal penumbuh iya ti deka meri peransang ngagai bala nembiak angkunka pelajar sekula ti nyadi kunchi pengidup menyana sereta mansutka diri ari perekuh penyeranta.

Berebak enggau nya, tim Projek Pensel mega udah nyuaka pemeri set pensel ngagai bala nembiak di rumah panjai Bakong Ai nyadika peransang sida angkunka pelajar.

Penatai Norina enggau bala bukai dilalu enggau adat basa lalu dibai bejalai niti ruai ngena tabuh ngading ajat, dilaluka duduk ba ruai tuai gawai taun tu sereta dinah macham pemakai asal kitai di rumah panjai.

BASA TUAI GAWAI… Norina disempulang bala bukai duduk ba ruai sereta dinah macham bansa pemakai asal rumah panjai.

 

KE PERANSANG… Bala nembiak nerima pemeri set pensel ari tim Projek Pensel begambar enggau Norina.