Gawai di Rumah Benet – Bukit Papit ‘terang’ taun tu

BINTANGOR: Peranak Rumah Benet di Bukit Papit di baruh pegai Dun Daro ditu diatu berasai lantang pengudah nerima bekal kuasa karan 24 jam.

Ngelama tu sida serumah semina bepanggai ba injin api ngulihka bekal kuasa karan ti begunaka belanja besai.

Sida serumah berasai gagit amat nerima berita manah tu sereta ulih berami ngintu Gawai Dayak enggau ati lantang.

Kaban Kunsil Nengeri (Adun) Daro, Safiee Ahmad nengah laman portal rasmi N.43 Daro madah, kesemua 16 pintu bilik rumah panjai nya udah disambung bekal kuasa karan ari grid besai.

Perengka guna nya ku iya disedia Perintah Sarawak nengah Skim Bekal Kuasa Karan Menua Pesisir (SARES).

“Sedarka peminta rayat ditu, aku naka ulih minta bekal kuasa karan disambung ngagai menua sida.

“Ari berekat enggau pengepuh kitai gawa, diatu kitai ngasaika asil iya,” ku Safiee.

Pia mega ku iya, tu pemeri perintah ungkup rayat lalu iya ngarapka perengka guna nya dikena manah.

Berindik ari nya, iya mega deka meri terima kasih ngagai piak SESCO Berhad ti udah bebendar nyaup kitai nangkup peminta rayat tu.

Berebak enggau nya, Tuai Rumah Benet ngarika sida serumah meri terima kasih ngagai Perintah Sarawak laban siruka nasit enggau nangkup peminta sida ngasaika perengka guna pemun nya.

“Kami meri tabi puji laban udah lama nganti diri ngasai bekal kuasa karan 24 jam, diatu udah nyadi nyata,” ku iya.

Suara Sarawak