KUCHING : Semangat beserakup dalam siti pengerami nunjukka doktrin penyerakup ke chukup tinggi dipandangka raban bansa Dayak ari Sematan nyentuk ke Lawas.
Pemungkal Gerempung Pemikir Dayak Sarawak (DTTAS), Willie Henry Majang madah taja tubuh mayuh dipeda begulai tang kebendar semua ke datai ngulu pengerami nya ngembuan tuju ke siti iya nya penyerakup.
“Malam tu mai reti ke chukup besai ngagai semua kitai laban ulih begulai sempama jaku ‘siku dalam seribu’ lalu ngembuan doktrin penyerakup ba tikas ke pemadu tinggi.
“Pekara tu balat ngemegahka DTTAS laban ketegal sukung semua dia semua kitai ulih begempuru baka ke malam tu.
“Kitai ke datai ditu bisi nya menyadi kitai Selako ari Lundu, Bidayuh ari Bau, Kejaman, Kayan, Kelabit Kenyah, Lun Bawang sereta mega bala ari Kalimantan.
“Tu mandang kitai orang ke ulih beserakup. Ari serakup meh kitai ulih nyapai semua juluk ati ti diperambu kelebih agi juluk DTTAS sigi deka meda bansa maju ari semua sukut,” ku iya.
Willie madah munyi nya ba Pengerami Ngiling Bidai Gawai Dayak DTTAS 2022 ke diatur ba PCCK, Demak ditu malam ensana.
Nangkan ke nya, Willie madah pengerami malam nya naydi revolusi semangat beserakup semua bansa Dayak.
“Tu endang seriris enggau juluk DTTAS deka ngetanka semangat begempung, betulung ba semua pengawa, enti kitai begempung semua pengawa dikereja nyadi lempung sereta mujur,” ku iya.
Dulu ari nya, Chairman Pengatur Pengerami ke mega Diana David Itang ba jaku iya meri terima kasih ke semua pengabang ke bisi datai nyukung sereta bala kaban komiti ke udah besaup ngemujurka pengerami nya.
Bemacham aktiviti bisi diatur dikena ngerichahka pengerami Ngiling Bidai nya baka chabut tiket benasit, ngetas ranyai, mandangka main asal nebah gendang pampat, nyadaka leka timang, beperindang enggau artis tebilang Iban enggau ke bukai.
