Gawai Nyanggit Bulu: Ngangau Antu Gayu

GAWAI Nimang Bulu tauka Nyanggit Bulu dipenyadi ngambi bisi dikena ngangau enggau minta sah Antu Gayu.

Pengawa tu jarang dikereja kitai mensia kemaya hari lalu enti bisi pan jejarang.

Berindik ari penyarang nya, ukai semina bansa Gawai tu tau punas tang nemu lesap nyerunyut dunya moden.

Nya alai cherita ngelansa pasal Gawai tu mengga mimit pan bisi dikena bansa Iban ngelala gaya sereta pengidup kitai rumah panjai baka dulu kelia.

Gawai tu diatur enti bisi diasuh antu ari mimpi tauka kenyap orang ke bempu tubuh ti nirika gawai nya.

RINTAI SIDA SEBILIK… Ngepan Belanjang magang, sida sebilik ke bela disangkung lebuh nirika Gawai Nyanggit Bulu.

Gawai tu mega dikelala ngena nama bukai baka di Engkilili orang nyebut iya ngena nama Gawai Nambakka Bulu seraya di ai Belawai Kapit, orang menua nya ngangauka iya enggau nama Gawai Nyanggit Bulu.

Tuju Begawai

Orang ke ngempu pengawa dalam kenang sekali tu iya nya Jimbun Anak Lai lalu udah diintu di Rumah Marung, Sungai Belawai, Kapit kena 30 Mei 2015.

Jimbun nirika gawai tu dikena ngeraga enggau ninding tubuh diri sereta begawaika diri gayu guru gerai nyamai nguna menua pengudah mulaika diri gawa ari menua tasik.

Kelimpah ari nya, Jimbun mega ngarap lalu besampika sida sebilik deka diau lantang, chelap lindap sereta likun diibun petara.

MUNGKAL GAWAI… Pengawa begawai tu dipunka ngena pengawa Meri Babi Sandau mandi ba sungai ke enda jauh ari rumah panjai nya.

Kelimpah ari nya, leka sampi enda ngelaungka diri bulih tuah, bulih padi maya bumai betaun, bulih rejeki lebuh bekereja ngiga belanja di menua bukai.

Timang lemambang mega ngayuka sida serumah deka diau bebaik enggau sepenemu sereta nadai ngembuan ati kepapas ngagai pangan diri, ulih segulai sejalai ngereja semua pengawa nentuka pemujur enggau pemansang.

Pengawa sida serumah ti besukung lebuh nirika gawai besai baka Gawai Nyanggit Bulu tu laban kitai bansa Iban kelia endang pechayaka mimpi tauka kenyap.

Nya kebuah sebedau ngereja pengawa kitai ti diau di rumah panjai suah agi betanyaka mimpi betanyaka kenyap pangan diri.

Kebuah pia laban kitai nangika diri ngelaban mimpi ngelanggar kenyap, suah agi kitai diau enda kereja sebarang pengawa enti kitai enda manah mimpi, jai kenyap.

MIRING BA TANJU… Berengkah miring diulu Lemambang sereta sida ke landik ba pengawa nya.

Dalam leka timang ba Gawai Nyanggit Bulu mega ngading orang ketuai betanyaka mimpi bala sida ke indu-indu ti tinggal di rumah maya ditinggalka bala sida pungka lelaki bejalai.

Kemayuh agi mimpi sida ke indu-indu tu manah, ngayuka pemulai sida ke lelaki bisi mai utai tauka buah jari, baka pemulai Jimbun gawa ari menua tasik.

Nirika Gawai Nyanggit Bulu

Nikalka kenang kitai, nyempulang gawai tu mega, bela diatur Gawai Sandau Hari; dikena nela nasit sereta batang tubuh sida ke lelaki ba ruang bilik tu.

Tumu pagi sehari nya, Babi Sandau empat iku, nitihka penyampau tubuh sida ke lelaki dalam bilik empat iku, dipandi ba sungai dulu sebedau digalika ba tanju rumah iya.

PENGEMPU GAWAI: Semina orang ti dibasa dikangau Nganggit Bulu ba baju orang ke ngempu gawai nya.

Ensarau endur ngalika Babi Sandau digaga ba ujung tanju lalu dipiring ba dia mega seraya piring ti dikena mega iya nya piring empat kali lapan.

Piring ti dibantai tu endang dikena nganggauka bunsu antu, petara enggau sida ari Panggau Libau ngambika datai kia ngesah pengawa sida ti begawai.

Orang ti miring endang sida ti tau jari sereta bepenau ba pengawa ngintu piring ungkup gawai besai baka Gawai Nyanggit Bulu tu.

Muakka lemai, lemambang lalu berengkah nimang ba ruai orang ti bempu gawai dataika pagi hari siti.

Babi Sandau mati pan pengawa nimang agi dipejalai nyentuk pengawa nyanggit bulu dikereja.

Sida ti dipilih nyanggitka bulu tu orang ti ditemu beberita jelai nama enggau ngembuan penau sereta pengelandik, nadai ngira indu tauka lelaki asal kebal bulu, enda alah ayu.

Maya tu orang ke dipegawai diasuh duduk ba panggau tauka atas tawak sereta mangku piring tubuh sekali lapan lebuh Lemambang nyada enggau nyaguka leka timang.

Nyau dini hari, raban orang indu enggau lekaki ti landik sereta dipebasaka orang pan berengkah Nyanggit Bulu tauka nyait ubung mansau ti udah disedia.

Sida sebuat deka nyait ubung mansau ba baju bulu tauka baju ti tau dikena maya iya sakit awakka ngasuh pengidup regas, gerai, gayu sereta lantang diau nguan menua tu.

Sambil nyait ubung nya, sida deka nyebut leka sampi baikka nya benyawa tauka dalam ati, nyampika orang ti disanggit bulu tu bepengerai lalu semengat iya deka likun.

Baju endur nyait ubung mansau tadi tau dikena iya besesehari tauka lebuh ngereja pengawa ti berat lalu baju tu nyadika dinding bulu iya.

Pagi nya babi gawai pen dibunuh lalu ati iya lalu dipeda kena nela nasit orang ke ngempu gawai.

Lemambang nimang nyempulang gawai tu nyadi. Tembu pengawa Nyanggit Ubung tu tadi kelai penembu gawai nya.

Ari Sukung Pengawa Lempung

Sekayu rumah panjai sehari nya, orang lelaki nengkira perengka dikena begawai sereta sida ke indu kiruh bebelaka pemakai di bilik orang ke ngempu pengawa.

Semua pengawa dikereja ngena chara beduruk enggau betulung ari kereban berapi baka kayu, periuk kali pinggai mangkuk dataika mela enggau manduk pemakai.

Sida ke lelaki deka nurun ngupa baka upa pantu, lengki enggau upa aping sereta begigaka daun babas nyengkaum daun sabung, ngiga tubu enggau lauk ke bukai.

Sida serumah enggau bala pengabang ti bisi dikangau datai, ari ulu enggau ari ili deka dinah pemakai enggau diintu sereta dibasa baka ngintu pengabang ba gawai besai bukai.