Gawai Panggau Tuah Raja

Ngintu tuah, meri terima kasih ke Petara

Enda mayuh rebak baru nemu tauka kala ninga pasal gawai ke dikumbai Gawai Panggau Tuah Raja, sebengkah ari bansa gawai ke jarang diintu raban bansa Dayak Iban kemaya hari.

Nyemetak munyi ke disebut, gawai tu dikena ngintu tuah ngambika ruang bilik orang ke ngintu gawai nya tau betuah belimpah, bidik lansik, gerai nyamai, muntang ngidupka diri sereta bulih pengaya, pengeraja.

Minta Berekat Petara

Kenang pemadu manis pengarang lebuh meda empu baka ni gawai tu diintu tiga hari berunggu lalu orang ke gawa ngintu gawai tu iya nya Lembong anak Merum di Rumah Marung, Sungai Belawai, Kapit kena 27-29 Mei 2015.

PENGEMPU GAWAI: Lembong Ak Merum, orang ke ngempu Gawai nya.

Nitih ku randau pengarang enggau orang ke ngempu pengawa, gawai tu mega diintu nyadika sebagi ari chara meri terima kasih ngagai Petara ke udah meri tuah meri limpah ngagai ruang bilik iya sereta minta petara merekat sida sebilik.

Nebang Kayu

Ba hari keterubah, pengawa nebang kayu pelai digaga nyadika panggau ngena piring lapan sereta dipankungka tawak enggau bebendai dikena nejal pending orang ke gawa nya ari ninga burung ti enda manah.

Tembu kayu disayat nyadika papan, iya dibai niki ke rumah sereta diiring ngena pangkung tawak enggau bebendai sida ke indu.

Sebedau kayu nya dibai ke ruai orang ke ngempu pengawa dulu dibiau ngena manuk laki seiku sereta piring lapan.

DISEMPULANG TABUH: Raban orang indu bepangkungka Tawak enggau Bebendai lebuh miring enggau nebang kayu pelai ti deka digagaka panggau.

Lebuh datai di ruai, sekali agi kayu pelai tu dipiringka ngena piring lapan.

Panggau Tuah

Datai ba hari kedua, pengawa ngukir panggau dientudika pengawa ngaga penuduk iya diatur ngena piring lapan.

Orang ke dipaduka ngaga ukir iya nya Abit Jengko ti ditemu beberita enggau tampak nama sereta bepenau ngereja pengawa nya nitihka adat enggau rurun pengawa.

Kebuah pia laban orang ke ngukir enggau ngaga penuduk panggau patut orang ke ngembuan penemu sereta bisi dinding bulu.

NIKI KE RUMAH… Kayu pelai ke udah disayat dibai niki ke rumah lalu dibiau ngena manuk laki siku.

Pengudah semua pengawa ngaga panggau, ngukir sereta penuduk nya tembu, panggau tu lalu didudukka ba penuduk iya.

Ngerandang, Mupu Ubung

Malam nya, sekayu rumah panjai lalu Mupu Ubung. Genap mua pintu di rumah panjai nya dipelintangka ngena ubung bechura mansau tauka mirah.

Raban orang ke mupu ubung tu diuluka Gendang Ak Giang ke megai pengawa Ngerandang enggau Mupu Ubung.

Pengawa tu disereta sida ke lelaki, bejalai niti ruai, ari bilik ke bilik, berengkah ari setak ili rumah dataika ulu.

NIKI KE RUMAH… Kayu pelai ke udah disayat dibai niki ke rumah lalu dibiau ngena manuk laki siku.

Tuai pengawa, aya Gendang dulu agi nanya penyadi bilik, ditimbal orang ke ngempu bilik.

Meri Babi Mandi

Kelimpah ari nya, pengawa sehari tu mega disempulang ngena pengawa meri Babi Sandau enggau Babi Tuah mandi tumu pagi.

Udah babi empat iku, Babi Sandau diengkah ba tanju sereta seiku Babi Tuah diengkahka ba bilik besai orang ke ngempu pengawa tu.

Lemai nya mega, semua babi tu diberi makai ngena piring empat kali lapan (Babi Sandau) sereta sekali lapan (Babi Tuah).

NGUKIR PANGGAU… Abit Jengko benung kiruh ngaga sereta ngukir panggau.

Hari Gawai Nyadi

Hari kepenudi nuntung ba hari gawai nyadi, pengawa Ngerandang lalu diatur.

Sehari nya, lebuh gawai nyadi sekayu rumah panjai kiruh bebelaka pemakai sereta nyendiaka rengka piring nyengkaum pengawa manduk Lumpang.

Tumu pagi nya mega, Babi Sandau lalu dibunuh disempulangka leka Timang ari bala lemambang ke dikangau ngading gawai.

Udah Babi Sandau tu mati, orang ke munuh babi lalu nela ati iya.

MEGAI TUAH… Gilu (Manang) Orang dipaduka megai Babi Tuah; munuh sereta meda ati babi nya.

Pengawa meda tauka macha ati Babi Sandau tu deka mantaika bacha tauka tela iya ti ngayanka tuah tubuh sereta pengawa tauka ulah orang ke ngempu Babi Sandau nya.

Pengudah Babi Sandau tu mati lalu pengawa di tanju nya tembu, baru raban sida tu mulaika diri ngagai bilik besai alai endur Babi Tuah digali ba langkau ti diseruyung ngena pua kumbu.

Leka Timang Ngading Gawai

Bala lemambang mega nyadaka leka timang berebak enggau pengawa munuh Babi Tuah.

Nuntung lemai hari, Lemambang Jinggan ti nyadi pematak jalai, Chugat enggau Ranggie Merum ti nyagu tauka ngelembung lalu mupuk baru nimang nyentuk panggau nya diangkat lalu disimpan ba penuduk iya ti udah disedia ba ruai orang ke ngempu Gawai Panggau Tuah Raja nya.

Lebuh leka timang disada, orang ke ngempu pengawa, aya Lembong tu tadi duduk dalam panggau disempulang ngena piring enam kali lapan.

Gawai lalu tembu pengudah panggau nya duduk ba penuduk iya.

NELA TUAH… Tu mih gaya ati Babi Tuah ngayanka tuah pengempu Gawai.

 

DIRAGA… Sapat digaga ngena pua kumbu enggau tikai bemban dikena ngeraga piring enggau panggau tuah.

 

DITIMANG… Lembong Merum duduk dalam panggau lalu mangku piring enam kali lapan seraya Lemambang Pematak Jalai disempulang dua iku nyaguka leka timang iya.

 

PANGGAU DITIKI… Panggau ditikika ba ruai pengempu Gawai Panggau Tuah Raja nya sereta ditiup ngena pua kumbu.

Suara Sarawak